2 persona kanë humbur jetët nga Covid-19 në 24 orët e fundit në vendin tonë, duke e çuar totalin në 51 të vdekur.
Gjatë përditësimit të situatës së koronavirusit në vend, Ministria e Shëndetësisë bëri me dije se këta qytetarë nuk kanë mundur që të fitojnë luftën me virusin vdekjeprurës.
Në njoftimin e Ministrisë u theksua se viktimat janë një 76-vjeçar nga Tirana, i cili pasi ishte përmirësuar pas 15 ditëve trajtim ka humbur jetën papritur.
Ndërsa viktima e dytë është një 54-vjeçar, që ndodhej në gjendje të rëndë dhe ka ndërruar jetë në urgjencën e spitalit.
“Gjatë 24 orëve të fundit, për fat të keq dy qytetarë nuk e kanë fituar dot betejën me sëmundjen, pavarësisht asistencës së madhe të mjekëve dhe trajtimit mjekësor.
Dy humbjet e jetës kanë qenë të papritura. Një 76 vjeçar nga Tirana, me disa sëmundje bashkëshoqëruese, pasi ishte përmirësuar pas 15 ditësh trajtim, ka pësuar tromboemboli pulmorare. Dhe një 54 vjeçar në gjendje të rëndë, me insuficencë renale, ka ndërruar jetë në urgjencën e spitalit. Ministria e Shëndetësisë dhe Mbrojtjes Sociale u shpreh ngushëllimet familjarëve të të ndjerëve”, tha Eugena Tomini.ka.ta/Fjala.al/
