Njëqind liderë, ish-krerë shtetesh dhe qeverish, fitues të çmimit Nobel dhe aktorë kanë nënshkruar një apel, të promovuar nga fituesi i çmimit Nobel të Paqes, Muhamed Yunus, për “qeveritë, fondacionet, filantropët dhe ndërmarrjet që të ofrohen për të prodhuar dhe shpërndarë vaksina falas në të gjithë botën”.
Ideja që qëndron pas kësaj nisme është fakti se mënyra e vetme për të zhdukur pandeminë e koronavirusit, është pasja e një vaksine e cila duhet t’iu bëhet të gjithë banorëve të planetit, të pasur apo të varfër qofshin.
“Një pandemi tregon qartë forcën dhe dobësitë e sistemeve të kujdesit shëndetësor në çdo vend dhe nxjerr në pah pengesat dhe pabarazitë në sigurimin e aksesit në kujdesin shëndetësor. Efektiviteti i fushatës së ardhshme të vaksinimit do të varet nga universaliteti i saj”, thuhet në tekstin e apelit.
Mes nënshkruesve janë 18 fitues të çmimit Nobel, përfshirë Mikhail Gorbachev, Desmond Tutu, Shirin Ebadi, Lech Walesa, Tawakkol Karman dhe Malala Yousafzai.
Ndër ish krerët e shteteve dhe qeverive, Lula, Romano Prodi, Gordon Brown. Në mesin e artistëve, Andrea Bocelli, Bono, George Clooney, Matt Damon, Sharon Stone dhe Forest Whitaker.
Grupi i bëri thirrje Sekretarit të Përgjithshëm të Kombeve të Bashkuara, Drejtorit të Përgjithshëm të Organizatës Botërore të Shëndetit (OBSH), si dhe drejtuesve fetarë, korporatave dhe kompanive të mediave që të bashkohen për të siguruar vaksinat në dispozicion të COVID-19.
OBSH e shpalli shpërthimin e COVID-19 një pandemi në 11 Mars. Deri më tani, mbi 10 milion njerëz janë infektuar me koronavirus në të gjithë botën, me rreth 500,000 vdekje, sipas Universitetit Johns Hopkins./Bl.Ba/Fjala.al
