Fenerbahçe e ka refuzuar një ofertë të Tottenham, për Vedat Muriqin gjatë muajit janar. Televizioni turk “A Spor” zbulon se klubi nga Stambolli i kishte thënë “JO” një oferte prej 19 milionë eurosh për sulmuesin kosovar, por tani Spurs insistojnë për të marrë bomberin e Dardanëve, të favorizuar dhe nga kriza pas pandemisë, që ka ulur çmimet e ka ridimensionuar merkaton.
Në atë kohë, klubi nga Stambolli synonte të fitonte deri në 28 milionë euro për 25 vjeçarin shqiptar. Por me siguri, tani klubi turk do ta ketë të vështirë ta shesë përfaqësuesin kosovar për këtë shifër. Spurs e shohin ish-futbollistin e Rizesporit si alternativë ideale të Harry Kane.
Interesim për Muriqin ndërkohë kanë shfaqur edhe klubet e tjera angleze si Manchester United, Newcastle United, Leicester City, Leeds United, West Bromëich Albion, Southampton, Brighton e Burnley. Futbollisti nga Prizreni ka zhvilluar 32 ndeshje këtë sezon dhe ka realizuar 17 gola dhe i ka dhuruar 7 asiste. Ai ka kontratë me Fenerbahçen deri në vitin 2023.
