Prezantimi i rekomandimeve prioritare për Prokurorinë e Përgjithshme në kuadër të luftës kundër kriminalitetit për vitin 2020, u zhvillua këtë të enjte online.
Për Prokurorin e Përgjithshëm, Olsian Çela, ndryshimet kushtetuese dhe ligjore mbi të cilat vepron prokuroria kanë krijuar një dualitet mes prokurorit dhe gjyqtarit paraprak, i cili kontrollon hetimin dhe ka kompetenca që më parë i kishte vetëm prokurori.
Gjatë prezantimit Çela theksoi se prokurori dhe gjyqtari paraprake nuk e kanë mundësinë të veprojnë si një strukturë e mirë definuar vendimmarrëse.
“Për këtë arsye vlerësoj se ka ardhur koha që të rikonceptohet modeli i bashkëveprimit ndërinstitucional, me qëllim identifikimin e prioriteteve dhe rekomandimeve që marrin në konsideratë kuadrin kushtetues dhe ligjor, duke mos përjashtuar mundësinë e identifikimit të paqartësive apo mangësive ligjore në këtë drejtim”.
Çela vlerësoi si problematik edhe mungesën e hapësirës ligjore për t’i adresuar rekomandimet e qeverisë për luftën kundër kriminalitetit.
“Ekzekutivi duhet të gjejë mekanizmat e duhur për të rregulluar këtë anomali, pasi struktura kompetente për luftën ndaj krimit të organizuar dhe korrupsionit është Prokuroria e Posaçme, drejtuesi i së cilës raporton në Kuvend”.
Drejtuesi i SPAK, Arben Kraja, shprehu shqetësim që gjithë stafi i Strukturës së Posaçme nuk përfituar pagën e plotë. Ndërsa përfaqësuesja e Këshillit të Lartë të Prokurorisë, Esmeralda Cami, shprehu shqetësim për boshatisjen e sistemit për shkak të largimeve të prokurorëve nga procesi i vetingut.
Rekomandimet qeveritare në luftën kundër kriminalitetit për Prokurorin e Përgjithshëm janë: rritja e pavarësisë, lufta kundër korrupsionit, ajo ndaj krimit të organizuar, bashkëpunimi ndërinstitucional dhe respektimi i të drejtave të njeriut.
Bo.Ba/fjala.al
Bo.Ba/fjala.al
