Milan ka arritur të marrë një fitore bindëse dhe për më tepër me një përmbysje ndaj një disavantazhi të dy golave përballë kampionëve në fuqi të Juventusit.
Kuqezinjtë e Stefano Piolit triumfuan në “San Siro” me rezultatin 4-2 përballë “Zonjës së Vjetër” në ndeshjen e javës së 31-të të Serie A, duke vazhduar ecurinë e rezultateve pozitive pas rikthimit të futbollit nga ndalesa për shkak të pandemisë COVID-19.
Edhe pse me raste të shumta shënimi, fraksioni i parë i lojës u mbyll me rrjeta të paprekura, ndërkohë që e dyta do të sillte plot 6 gola.
Një “perlë” e Rabiot në të ’47-tën dhe një gol i Ronaldos gjashtë minuta më vonë, u duk se kjo përballje nuk do të kishte një tjetër histori nga ato të viteve të fundit, por nuk rezultoi kështu. Një penallti e akorduar nga “var” dhe e shndërruar në gol nga Ibrahimoviç në minutën e 62-të, do të rihapte takimin, ndërkohë që pesë minuta më vonë, në të 66-tën Kessie dhe në të 67-tën Rafael Leao, do të shënonin për të përmbysur rezultatin për “rosonerët”. Një gol i Ante Rebiç në minutën e ’80 të takimit do të vuloste triumfin për ekipin e tij.
Kuqezinjtë morën tre pikë të arta në garën për Europa League, ndërsa Juvja vazhdon kryesimin e qetë pas humbjes së Lazios dhe Interit./En.Br./Fjala.al
