Tashmë u bë një kohë e gjatë që Ministria e Shëndetësisë raporton shifra të larta të personave të infektuar me Covid-19. Kjo jo vetëm në Tiranë, por edhe në pothuajse të gjithë qytetet e vendit.
Konkretisht gjatë ditës së sotme janë shënuar 82 raste të reja nga rreth 400 tampone që janë realizuar në 24 orë.
Pesë raste të reja janë shënuar në qytetin e Elbasanit, ku pas mbylljes së pavijonit të Gjinekologjisë, COVID-19 është përhapur dhe tek bluzat e bardha, por ka prekur gjithashtu dhe një fëmijë.
Burime për “Fjala” bëjnë me dije se ndër rastet e reja është ai i infektimit të një mjeku reanimator, i cili ka rezultuar pozitiv ndaj testit të COVID-19.
Fatkeqësisht veç mjekut kanë rezultuar të prekur edhe familjarët e tij. Pozitiv ndaj testit kanë rezultuar dhe bashkëshortja dhe vajza e mjekut në Elbasan.
Dyshohet se infektimi i mjekut ka ardhur si rezultat i kontaktit që ka patur me maminë e repartit gjinekologjik, ku disa ditë më parë u infektuan dy punonjëse të këtij pavijoni.
Po ashtu ndër rastet e konfirmuara ditën e sotme rezulton të jetë dhe një mjek pediatër, për të cilin ende nuk dihet se kush ka qenë shkaku i prekjes nga Covid-19.
Ndërkohë që raportohet se mes të prekurve është dhe një fëmijë i moshës 4-vjeçare.
Ndërkohë në vendin tonë aktualisht janë 1273 persona aktivë me Covid-19, dhe 83 viktima të shënuara qysh nga nisja e pandemisë.
Humbjet e jetës janë shënuar në Tiranë 46, Durrës 13, Fier 5, Vlorë 2, Shkodër 12, Kukës 1, Elbasan 2, Lezhë 1 dhe Berat 1.
Shpërndarja gjeografike e rasteve aktive sipas qarqeve: Tiranë 509; Durrës 215; Shkodër 173; Vlorë 116; Lezhë 64; Fier 41; Elbasan 33; Korçë 32; Kukës 32; Berat 24; Gjirokastër 17 dhe Dibër 17./Bl.Ba/Fjala.al
