Kapiteni i Kombëtares kërkon përmbysjen në ndeshjen e dytë me Olimpiakosin përballë Panathinaikosit. Kapiteni i Kombëtares kuqezi të volejbollit të meshkujve, Gazmend Husaj, i cili është i vetmi që po luan, teksa Greqia është një nga të paktat vende të kontinentit të vjetër që ka rinisur sezonin e mbetur pezull, ka të shtunën shansin e fundit për të synuar titullin “kampion”.
32-vjeçari u zhvendos në fillim të këtij sezoni në volejbollin helen, pasi kishte siguruar kurorën e kampionit në Francë, me skuadrën e Turit. Por volejbollisti që militon në radhët e Olimpiakosit, e ka humbur duelin e parë të finales të “play-off”-it për titull, duke u mundur në 3 sete në shtëpi përballë Panathinaikosit.
Në fakt, ka qenë një rrugë me një kalim kjo përballje midis rivaleve helene, pasi Panathinaikosi ka dominuar ndaj Olimpiakosit, duke e marrë setin e parë 25-19, ndërsa e njëjta tablo ka qenë edhe në setin e dytë, të cilin skuadra mike e fiton 25-22. Ndërkaq, edhe më bindës ishte kryesimi i Panathinaikosit në setin e 3-të, duke e marrë edhe atë 25-19 dhe gjithë takimin me 3-0 me sete brenda një ore e 28 minutash.
Tanimë skuadra e shqiptarit përballet me detyrën e vështirë të fitores me të njëjtat shifra ose 3-1 në duelin e dytë të finales, që do ta luajnë në fushën e Panathinaikosit, për ta çuar këtë duel final në përballjen e 3-të dhe të fundit, që do ta luajë në shtëpi.
Për Olimpiakosin, ky do të ishte titulli i 30-të “kampion” në histori, por detyra është bërë tashmë shumë e vështirë. Takimi i dytë luhet të dielën në mbrëmje, duke nisur nga ora 17:30./Bl.Ba/Fjala.al
