Ministri gjerman i Shëndetësisë, Jens Spahn ka paralajmëruar sot se kërcënimi për një valë të dytë infektimesh me COVID-19 është real dhe iu ka kërkuar qytetarëve të tij që të respektojnë distancimin fizik gjatë pushimeve në Ishujt Baleare.
Në veçanti ai shprehu shqetësimin për situatën në ishullin spanjoll të Majorkas, arkipelagu kryesor i Baleareve, një vend pushimesh veçanërisht i frekuentuar nga gjermanët, deri në pikën që ata e quajnë “rajoni i 17-të” i vendit të tyre, i cili ka 16 Lande.
Gjermanët përbëjnë 27% të pushuesve në Baleares, një arkipelag ku turizmi përbën 35% të PBB-së.
“Imazhet që kemi parë këtë fundjavë në ishullin e preferuar të gjermanëve, Majorka, më shqetësojnë. Ne duhet të bëjmë shumë kujdes që ishujt Baleares të mos kthehen në një Ischgl të dytë, një stacion skish austriak, që u kthye këtë dimër në një vatër kryesore europiane të kontaminimit me COVID-19”, deklaroi Spahn në një konferencë shtypi, të organizuar me Institutin Robert Koch.
“Kërcënimi për një valë të dytë është real”, theksoi Spahn, i cili i trembet një rritjeje tjetër të rasteve me COVID-19 në Gjermani me rikthimin e turistëve nga pushimet në Europë.
Disa video kanë treguar dhjetëra turistë gjermanë apo britanikë, shpesh të dehur, duke bërë festa të zhurmshme në rrugët e Majorkas, pa mbajtur maska dhe pa respektuar distancën fizike.
/En.Br./Fjala.al
