Kryeministri Edi Rama i ka kthyer përgjigje të prerë Presidentit të vendit, Ilir Meta, i cili theksoi vetëm pak më parë se ndryshimi i sistemit bëhet vetëm me referendum.
Me një shënim në Twitter, Rama thekson se “Askund nuk bëhet referendum për këto çështje”.
“IM thotë ndryshimi i sistemit, heqja e koalicioneve, hapja e listave bëhen vetëm me referendum! Askund nuk bëhet referendum për këto çështje.
Ndërsa këtu as sistemi s’do ndryshojë, as koalicionet s’do ndalohen, po listat do hapen nga Kuvendi i Shqipërisë me ligj, me zakon e me karton!”,shkruan Rama.
Më herët në konferencën për mediat Presidenti Ilir Meta u shpreh se vetëm me referendum mund të vendoset hapja e listave. “Duan ta heqin, ja ku është presidenti le të vijnë, edhe populli këtu është, më thonë nga 2 marsi shpërndaje, shpërndaje (parlamentin).
Ti thërrasin mendjes, se koalicionet i ka vendosur populli shqiptar. Duan ta bëjnë pa koalicione ta vendosin në referendum. Nga ana ime nuk ka asnjë pengesë, por le të vendosë populli. Sovraniteti i takon popullit”./Bl.Ba/Fjala.al
