Niveli i dytë i Kampionatit Kombëtar të Futbollit, që njihet si Kategoria e Parë, ka dhënë të shtunën verdiktet sa i përket nëngrupit të “play-off”-it, pra zonës për ngjitjen një kategori më lart, teksa ndeshjet janë mbyllur në të dy grupet. Duhet theksuar se Kastrioti më herët dhe Apolonia më pas, e kishin siguruar pak javë më parë edhe matematikisht të drejtën për të luajtur midis më të mirave të futbollit shqiptar sezonin që vjen.
Ndërsa formula e adoptuar këtë sezon u jep edhe një shans tjetër për në Superiore sezonin e ardhshëm, pasi vendet e dyta të dy grupeve përballen me njëra-tjetrën në një duel shtesë dhe skuadra që fiton, vijon më pas të përballet në një tjetër duel shtesë me të 8-tën e Kategorisë Superiore, vend që, për momentin, mbahet nga Vllaznia. Dhe pikërisht, këto dy skuadra janë njohur të shtunën dhe ato janë Besëlidhja dhe Pogradeci.
Të shtunën u luajtën 4 sfidat e fundit të vlefshme për “play-off”-in e Kategorisë së Parë, në Grupin A dhe B. Padyshim që e gjithë vëmendja ishte te finalja e vendit të dytë, mes Pogradecit dhe Lushnjës, e cila u fitua nga liqenorët me rezultatin 1-0 falë golit të Peresit. Me këtë fitore pogradecarët e mbyllin sezonin në vendin e dytë dhe do të përballen me Besëlidhjen, që ishte skuadra që zuri vendin e dytë në përfundim të ndeshjes të Grupit A.
Fituesi i këtij çifti do të luajë më pas me vendin e 8-të të Kategorisë Superiore, ku do të vendosen dhe fatet e sezonit. Besëlidhja shmangu katastrofën në Peshkopi, duke barazuar shifrat 18 minuta para fundit përballë Korabit vendas, që ishte edhe sfidanti i vetëm për vendin e dytë. Gjithsej në 4 sfidat e së shtunës u shënuar 14 gola, ndërsa patri dy barazim dhe dy fitore të vendaseve.ka.ta/Fjala.al/
