Tre persona janë ekstraduar në Tiranë ditën e sotme ku do të përballen me drejtësinë shqiptare pasi janë dënuar për vrasje dhe shitblerje armës të ftohta. Bëhet me dije se të ekstraduari janë dy nga Belgjika dhe një nga Italia.
Një prej të ekstradueve nga Belgjika është Gjon Menga nga Kurbini, 56-vjeç i dënuar me 25 vite burg për vrasje. Gjon Menga ishte shpallur në kërkim ndërkombëtar pasi Gjykata e Rrethit Gjyqësor Kurbin e ka dënuar me 25 vjet burgim, pasi në vitin 2004 ka vrarë me armë zjarri një person dhe plagosi 4 të tjerë.
Gjithashtu nga Belgjika u ekstradua edhe Luigj Dema, 26 vjeç, lindur në Tiranë. Ai ishte shpallur në kërkim ndërkombëtar, pasi Gjykata e Rrethit Gjyqësor Tiranë e ka dënuar me 19 muaj e 4 ditë burg, për veprën penale “Prodhimi, mbajtja, shitja apo blerja e armëve të ftohta”.
Nga Interpol Tirana u krye ekstradimi nga Roma i Manol Begajt alias Martin Begaj 41 vjeç, lindur në Samatice, Berat. Ai ishte shpallur në kërkim, pasi Gjykata e Apelit Durrës ka rrëzuar vendimin e Gjykatës së Rrethit Gjyqësor Kavajë për lirimin me kusht duke urdhëruar vuajtjen e dënimit të mbetur 1 vit, 1 muaj e 15 ditë burgim për vrasje e një personi në Berat./Re.Gu/Fjala.al
