Pas marrëveshjes së firmosur sot mes mazhorancës dhe opozitës parlamentare ku u dakordësuan për votimin më 23 korrik të marrëveshjes së 5 Qershorit dhe më 30 korrik të ndryshimeve kushtetuese, ka ardhur dhe një reagim zyrtar nga opozita jashtëparlamentare.
Në një deklaratë zyrtare shprehen se akti i sotëm është dëshmi e planit diabolik të kryeministrit Rama që të miratojë fillimisht për fasadë marrëveshjen e 5 Qershorit dhe vetëm 1 javë më vonë ta zhbëjë atë me ndryshime të njëanshme kushtetuese, që ndalojnë koalicionet si subjekt zgjedhor.
Sipas tyre, ndryshimi i njëanshëm kushtetues për ndalimin e koalicioneve zgjedhore zhbën të dyja marrëveshjet politike për zgjedhjet, atë të 14 Janarit dhe atë të 5 Qershorit dhe shtojnë më tej se kjo gjë përbën një akt të rrezikshëm me pasoja të paparashikueshme për stabilitetin e vendit.
Në fund, Opozita e Bashkuar iu garanton shqiptarëve se faturën e rëndë që ky akt sjell për demokracinë, stabilitetin dhe integrimin e vendit ne BE, ta paguajë vetëm Edi Rama dhe jo Shqipëria e shqiptarët.
DEKLARATË E OPOZITËS SË BASHKUAR
Ndryshimi i njëanshëm kushtetues për ndalimin e koalicioneve zgjedhore zhbën të dyja marrëveshjet politike për zgjedhjet, atë të 14 Janarit dhe atë të 5 Qershorit.
Akti i sotëm është dëshmi e planit diabolik të Edi Ramës që të miratojë fillimisht për fasadë Marrëveshjen e 5 Qershorit, të vërë në lojë partnerët tanë strategjikë, SHBA dhe BE dhe vetëm 1 javë më vonë ta zhbëjë marrëveshjen me ndryshime të njëanshme kushtetuese, që ndalojnë koalicionet si subjekt zgjedhor.
Edi Rama gënjen, kur thotë se po hap listat, sepse pjesën fituese të tyre, 1/3 e listës, e mban të mbyllur, duke dalë zbuluar se i vetmi qëllim është ai i ndalimit të koalicioneve si subjekt zgjedhor.
Zhbërja nga Edi Rama i marrëveshjeve të 14 Janarit dhe 5 qershorit përbën një akt të rrezikshëm me pasoja të paparashikueshme për stabilitetin e vendit.
Ky akt i paprecedentë në 30 vite pluralizëm është, po kështu, një thyerje e rëndë e besimit të partnerëve strategjikë SHBA dhe BE që u investuan, përshëndetën dhe vazhdojnë të insistojnë në zbatimin e Marrëveshjes së 5 qershorit pa asnjë ndryshim dhe pa ndryshime kushtetuese që e shkatërrojnë atë.
Ky akt tinzar prej frikacaku tregon tmerrin e kryeministrit në ikje nga zgjedhjet dhe rotacioni i pashmangshëm. Opozita e Bashkuar garanton të gjithë qytetarët se do të bëjë gjithçka, që faturën e rëndë që ky akt sjell për demokracinë, stabilitetin dhe integrimin e vendit ne Bashkimin Europian, ta paguajë vetëm Edi Rama dhe jo Shqipëria e shqiptarët.
/En.Br./Fjala.al
