Formula 1 ka bërë të ditur se ka anuluar garat e Çmimit të Madh të SHBA-së, Meksikës dhe Brazilit, si rezultat i krizës së shkaktuar nga epidemia e virusit korona në ato vende. Me rritjen e shkallës së infektimit në këto 3 shtete, drejtuesit e Formulës 1 thonë se do të ishte e papërgjegjshme që këto gara të mbahen.
Në vend të tyre, për të plotësuar kalendarin, bëhet e ditur se 3 gara të tjera në Evropë pritet t’i shtohen Botërorit të këtij viti. Kështu, do të ketë rikthim në Nurburgring në Gjermani, në Imola në Itali, ndërsa debutimin në Formula 1 do të bëjë edhe pista e Portimaos në Portugali.
Çmimi i Madh i SHBA-së, në Ostin të Teksasit, ishte e parashikuar të zhvillohej më 23 tetor 2020, gara e Meksikës në Meksiko Siti një javë më vonë, ndërsa ajo e Brazilit më 13 nëntor 2020. Megjithatë, zyrtarët e Formula 1 e kanë pranuar se do të jetë e pamundur që këto gara të zhvillohen.ka.ta/Fjala.al/
