Vera Huqi, 45-vjece banuese në Tiranë, kërkon ndihmën e qytetarëve pasi ndodhet në vështirësi ekonomike dhe shëndetësore.
Në emisionin ‘Fiks Fare’, Vera shprehet se fëmijët e saj 1 dhe 5 vjeç nuk mund të shkollohen pasi nuk kanë mundësi ekonomike. 45-vjeçarja është trajtuar me kemp për rreth dy vite pasi është e paralizuar nga duart.
Në 2014-n komisioni për caktimin e KEMP-it në qytetin e Durrësit ia hoqi këtë të drejtë. Sot, nëna e dy fëmijëve thotë se të miturit qajnë për bukë.
“Nuk më vjen djali 5-vjeçar brenda, sepse më thotë pse më bëre kur s’ke bukë të më japësh”, thotë Vera mes lotësh.
Myftari, burri i saj, 85-vjeçar është i paralizuar. Ai trajtohet me një pension pleqërie, por që sipas Verës lekët e tij nuk mjaftojnë as për ilaçe e drita. Në këtë familje kanë të gjithë probleme shëndetësore, pasi vajza 1-vjeçare vuan nga epilepsia dhe merr ilaçe çdo muaj.
“Unë nuk marr ilaçet e mia se s’kam para, e kam recetën aty. Marr vetëm ilaçet e vajzës. Kërkoj nga “Fiksi” të më ndihmojë se po më vdesin fëmijët për bukë”, bën thirrje zonja Huqi.
