I mbijetoi Luftës së Dytë Botërore, i mbijetoi varfërisë, shumë sëmundjeve dhe së fundmi pandemisë që ka pushtuar botën.
Ky është Giuseppe Paterno nga Italia.
Gjatë kësaj jave, 96 vjeçari, ish- punonjës i hekurudhave është diplomuar në Itali së bashku me shumë student të tjerë, rreth 70 vite më të rinj se ai.
“Unë jam një person normal, si shumë të tjerë”, tha ai, kur u pyet se si ndihej që po diplomohej kaq vonë. “Për sa i përket moshës, unë kam kapërcyer gjithë të tjerët, por nuk e bëra për këtë.”
Giuseppe Paterno u rrit duke i dashur gjithnjë librat, por nuk pati kurrë mundësinë të studiojë.
“Unë thashë: ‘o tani, o kurrë’ dhe kështu, në vitin 2017, vendosa të regjistrohem”, tha ai për Reuters në apartamentin e tij në qytetin sicilian të Palermos, në të cilin ditët e sotme, largohet rrallë për shkak të gjendjes së tij të dobët. E kuptova se ishte pak vonë për të marrë një diplomë 3-vjeçare, por i thashë vetes “le të shoh nëse mund ta bëj këtë”.
Ai u diplomua i pari në klasën e tij, me nderime të larta dhe duke marrë urime nga kancelari i universitetit, Fabrizio Micari.
I rritur në një familje të varfër në Siçili, në vitet e para të Dempresionit të Madh ai mori vetëm shkollimin bazë. Gjatë Luftës së Dytë Botërore ai u bashkua me marinën, më pas vazhdoi punën në hekurudha dhe krijoi familjen e tij.
Në një shoqëri të përqendruar në rindërtimin pas luftës, puna dhe familja ishin përparësitë, por Paterno dëshironte të mësonte dhe mbaroi shkollën e mesme në moshën 31 vjeçare, duke patur gjithnjë dëshirën për të vazhduar më tej.
Ai i shkruante esetë e tij në një makinë shkrimi manual. Paterno përdori Google për gjetjen dhe printimin e librave dhe nuk u tundua nga festat studentore të shokëve të tij të klasës, të cilët e duartrokitën me ngrohtësi në ceremoninë e diplomimit.
Gjithashtu, Paterno rrëfeu për shqetësimet që kishte patur me mësimin online gjatë karantinës, por ai tha se gjithsesi ia doli mbanë. Ndërsa i pyetur se çfarë do bënte më pas, ai tha se nuk do të ndalonte tani që ishte diplomuar:
“Projekti im për të ardhmen është t’i përkushtohem shkrimit. Ky është qëllimi im.”/Fjala.al/Ke.Ba
Burimi: Reuters
