Deputeti i PS-së, Ditmir Bushati ka ndarë lajmin e trishtë të ndarjes nga jeta të babait të tij, Sulejman Hamza Bushati.
Ai ka ndërruar jetë në Boston, pas një betejë me një sëmundje të rëndë.
Ditmir Bushati i ka dedikuar disa fjalë të atit në një postim në rrjetet sociale ku shprehet se nuk ka fjalë për të përshkruar dhimbjen e fëmijës për prindin.
“E ardhmja është një premtim, thoshte shpesh ai, dëshmi e shpirtit optimist e zemrës së madhe me të cilin jetoi jetën.” shkruan ndër të tjera ish-ministri i Jashtëm.
Sulejman Hamza Bushati njihej si pjesë e Bushatlinjve prej brezash të tërë, një ndër fiset më të mëdha në Shkodër.
Ai ka qenë kryetar i komitetit ekzekutiv të këshillit popullor të rrethit të Shkodrës, në vitet 1970-1974, me arsim të lartë. Më pas, i ndjeri Sulejman Bushati ka qenë edhe sekretar i parë i komitetit të PPSH në Shkodër, Kukës e Lushnje. Babai i ish-ministrit të punëve të jashtme ka punuar në drejtorinë e bujqësisë pranë komitetit qendror të PPSH deri në vitin 1991.
Postimi i plotë i Ditmir Bushatit:
Im Atë u shua sot në Boston, pas një beteje të vështirë me një sëmundje të rëndë. Nuk ka fjalë për të përshkruar dhimbjen e fëmijës për prindin kur shuhet drita udhëheqëse, dashuria e së cilës na ndriçon rrugën.
E ardhmja është një premtim, thoshte shpesh ai, dëshmi e shpirtit optimist e zemrës së madhe me të cilin jetoi jetën.
Prehu në paqe i shtrenti ynë!
/En.Br./Fjala.al
