Drita rrezikon eliminimin, organizmi që qeveris futbollin në Kosovë kërkon mirëkuptim. Federata e Futbollit të Kosovës ka kërkuar nga UEFA që të gjejë një mënyrë për t’ia mundësuar Dritës së Gjilanit zhvillimin e finales së fazës paraeliminatore të Ligës së Kampioneve. UEFA njoftoi të martën pasdite se është pezulluar ndeshja midis Dritës dhe Linfilldit, pasi një futbollist i ekipit nga Kosova rezultoi pozitiv në testet për virusin “Covid-19”.
Organizmi që qeveris futbollin kontinental njoftoi se vendimi është marrë për shkak se autoritetet zvicerane, ku po luhet kjo fazë, kanë vendosur për karantinim të lojtarëve të Dritës. Në rregulloren e UEFA-s theksohet se nëse shteti pritës liron të paktën 13 futbollistë nga karantina, ndeshja mund të zhvillohet, në të kundërtën, takimi mbyllet aforfe, me rezultat zyrtar 3-0 në favor të skuadrës kundërshtare, domethënë, asaj irlandeze.
Afati i fundit për zhvillimin e kësaj ndeshjeje është 14 gushti. Tanimë për të mundësuar zhvillimin e kësaj ndeshjeje dhe që të mos ndëshkohet Drita, FFK-ja ka kërkuar nga UEFA që të mundësojë zhvillimin e ndeshjes në një datë dhe në një vend tjetër. “Ndërkohë, FFK shpreson dhe beson që do të respektohet protokolli dhe rregulloret e UEFA-s në rastin e “Covid 19”, ku të infektuarit izolohen dhe të tjerët e vazhdojnë garën”, – thuhet në njoftimin e organizmit që qeveris futbollin në Kosovë.
“Me këtë rast, i lutemi UEFA-s dhe kërkojmë mirëkuptim që të mundësojë zhvillimin e kësaj ndeshjeje në ndonjë datë tjetër dhe vend tjetër me qëllim që mos të dëmtohet ekipi ynë”, – përfundon letra e Federatës së Futbollit të Kosovës drejtuar UEFA-s. Megjithatë, skuadra e Dritës rrezikon ta humbë ndeshjen në tavolinë për shkak të rregullores së re të UEFA-s për protokollin e “Covid-19”./Fjala.al
