Shpesh herë Bashkia e Tiranës ka nisur sensibilizimin e qytetarëve për të hedhur mbetjet në vendet e përcaktuara.
Edhe pse kushtet nuk mungojnë dhe të gjitha rrugët janë të pajisura me koshat përkatës dhe pastrohen vazhdimisht, qytetarët vazhdojnë të gabojnë në këtë drejtim.
Në disa raste mbetje të ndryshme hidhen jashtë koshave; në disa raste të tjera mbetje të sasive të mëdha hidhen në koshat e vegjël të cilët janë të papërshtatshëm për këto lloje mbeturinash, por ka edhe nga ata që preferojnë trotuarin në vend të koshit.
Kjo video e regjistruar e bërë publike nga Olesia Leco e ilustron më së miri situatën, ku një burrë, ndonëse në moshë dhe që duhet të ishte model qytetarie edhe për brezat e rinj, do ju bëjë të ngrini dyshime të forta mbi kulturën që kanë qytetarët.
“Edukata qytetare, viti 0. Ora 7.20, shikon majtas djathtas dhe lirohet nga pesha e tepërt. E publikova për të vetmen arsye pasi nuk është hera e parë që ky zotëri e bën këtë veprim. Turp”, shkruan Olesia Leco!
Pavarësisht masave të vazhdueshme të marra nga Bashkia e Tiranës, kjo situatë kërkon padyshim edhe kontributin e qytetarëve në këtë drejtim, për të kuptuar se Tirana është shtëpia jonë e përbashkët dhe duhet të kujdesemi për pastërtinë e saj ashtu siç kujdesemi për shtëpitë tona./Bl.Ba/Fjala.al
