Kreu i Shtetit Ilir Meta i ka akorduar pasditen e djeshme “Dekoratën e Flamurit Kombëtar”, ish Presidentit Rexhep Mejdani. Meta e vlerësoi Meidanin për përgjegjësinë e lartë shtetërore të treguar si President, për kontributin e çmuar për reformën e rëndësishme të Kushtetutës, për mbajtjen e referendumit të Kushtetutës në vitin 1998, për ngritjen dhe forcimin e institucioneve të pavarura, si dhe për mbështetjen për çështjen e Kosovës.
Në ceremoninë e vlerësimit ishin të pranishëm një sërë figurash të njohura politike, por ajo që binte në sy ishte prania e madhe e presidentëve apo ish-presidentëve, duke filluar nga Ilir Meta, Sali Berisha, Bamir Topi, Bujar Nishani, presidenti i Kosovës Hashim Thaçi dhe vetë Rexhep Mejdani. Nga ish-presidentët u vu re mungesa e Alfred Moisiut, për arsye të cilat ende nuk dihen.
Në ceremoninë e vlerësimit ishin të pranishëm gjithashtu dhe kryetari i Opozitës, Lulzim Basha, ish-kryeministri dhe Ministri për Diasporën, Pandeli Majko, kryetari i Akademisë së Shkencave, Skënder Gjinushi, deputetë, politikanë, diplomatë, akademikë, shkencëtarë, gazetarë dhe personalitete të shquara nga shumë fusha nga Shqipëria dhe Kosova. Ndërsa, mungoi kryeministri i vendit Edi Rama për arsye pune.
Ceremonia u zhvillua në ambient të hapur dhe duke zbatuar masat anti-COVID-19.
Më poshtë po ju sjellim disa nga fotot më interesante nga ceremonia e vlerësimit të ish-Presidentit Rexhep Mejdani./En.Br./Fjala.al
