Zbardhet dëshmia e 23-vjeçarit Stjuart Smakaj, i arrestuar si autor i dyshuar për vrasjen e shokut të tij të ngushtë Gledis Kraja, mbrëmjen e së hënës në Shkodër.
Pas negociatave me ndërmjetësinë e familjarëve, Smakaj u dorëzua në polici dhe pranoi autorësinë e krimit.
Ai ka shprehur pendesë para policisë, duke thënë se konfliktin e kishte me Denis Halilin dhe se Gledisin e kanë kapur plumbat gabimisht.
Stjuarti ka thënë gjatë marrjes në pyetje, se Denis Halili u largua drejt makinës dhe nga frika se mos merrte ndonjë armë, është ngjitur në shtëpi dhe ka marrë një armë duke hapur zjarr.
“Qëllova drejt makinës ku ishte Denisi, nuk e dija që brenda saj ishte edhe Gledisi, e kam vrarë gabimisht”, ka thënë i riu.
Më tej ka sqaruar se sherri nisi pasi Halili e kishte parkuar keq kamionin me të cilin po u sillte në shtëpi mobiljet dhe kjo ka bërë që të konfrontohen fizikisht.
Ndërkohë i shpallur në kërkim, i dyshuar si i përfshirë në ngjarje është edhe shoku i ngushtë i Gledisit, vëllai tjetër i Stjuartit, Sebastjan Smakaj.
Policia tha një ditë më parë se rrethimit të zonës, kontrolleve të shumta në bashkëpunim me FNSH dhe presionit të ushtruar nga forcat e policisë duke mbajtur në rrethim zonën ku fshihej autori, si dhe pas negociatave me familjarët, u bë e mundur vënia në pranga e autorit të ngjarjes së mbrëmshme ku mbeti i plagosur me armë zjarri dhe më pas humbi jetën 23- vjeçari Gledis Kraja.
Kështu mesditën e së martës u bë arrestimi i autorit, Stjuart Smakaj, 23 vjeç, banues në lagjen “Perash”.
I riu gjatë një konflikti të çastit ka tentuar të vrasë me armë zjarri shtetasin Denis Halili, ku si pasojë aksidentalisht ka ngelur i plagosur rëndë Gledis Kraja, 23 vjeç banues në lagjen “Perash”, Shkodër, i cili më pas ka ndërruar jetë në Spitalin Rajonal Shkodër.
Në cilësinë e provës materiale janë sekuestruar arma e zjarrit 18 gëzhoja të qitura nga kjo armë zjarri , automjetet të cilat janë të palëve në konflikt, si dhe vijon puna intensive për dokumentimin ligjor të kësaj ngjarjeje./Bl.Ba/Fjala.al
