Tirana ka mbërritur të martën në mesditë në kryeqytetin e Gjeorgjisë, Tbilisi, atje ku ka zhvilluar në mbrëmje edhe stërvitjen e parë dhe të fundit në prag të ndeshjes që do të luajë sot ndaj kampiones vendase, Dinamos.
Siç dihet, për shkak të epidemisë së virusit korona, organizmi që qeveris futbollin kontinental, UEFA, ka vendosur që ndeshjet e këtyre tureve të zhvillohen me një takim të vetëm dhe shorti vendosi që bardheblutë ta luajnë në fushë të huaj këtë sfidë.
Por kjo nuk e tremb trajnerin e Tiranës, Emanuel Egbo. “I kemi shanset te barabarta, por unë kam besim se mund t’ia dalim edhe pse ata luajnë në shtëpi, – ka thënë nigeriani i stolit bardheblu, duke folur në konferencë për shtyp para ndeshjes ndaj Tbilisit vendas.
‘Shpresojmë që të japim maksimumin dhe të marrim rezultatet që dëshirojmë. Personalisht nuk dua ta cilësoj si ndeshjen time më të rëndësishme. Kam besim te lojtarët.”
“Do të bëjmë më të mirën për të kaluar në turin tjetër, – ka vijuar ai. – Është një ndeshje për Ligën e Kampioneve dhe kemi ardhur për të dhënë maksiminun tonë. Do të futemi në fushë për të fituar. Shpresojmë që sa më shpejt të rikthehen tifozët në stadium, pasi janë një forcë për ne.”
Sikundër ishte parashikuar, Egbo do të bëjë disa ndryshime, aty ku spikat sektori i avancuar. “Sulmi? Ernest Muçi mund të zvëvendësojë Majkëll Ngo’onë”, – sqaroi Egbo./Fjala.al
