Tanimë kanë rënë të gjitha hipotezat që kishin qarkulluar dendur nëpër media dhe Antonio Konte do të vazhdojë të jetë trajner i Interit.
Kjo është mësuar pas një mbledhjeje për mëse 3 orësh, midis presidentit kinez të klubit milanez, Zhang dhe trajnerit zikaltër, aty ku është vendosur që palët të vazhdojnë bashkëpunimin.
Një lajm i tillë është konfirmuar nga vetë klubi në komunikatën zyrtare ku thuhet: “Takimi i sotëm mes Klubit dhe Antonio Kontes ishte konstruktiv, në emër të vazhdimësisë dhe ndarjes së strategjisë për të ardhmen. Në të u hodhën bazat për të vazhduar projektin së bashku.”
Pas dështimit në finalen e Ligës së Evropës, ditët e fundit ishin hedhur dyshime mbi vijimësinë e Kontes te zikaltrit, pasi vetë trajneri pati shpërthyer disa herë kundër drejtuesve të klubit.
Madje edhe pas finales me Seviljen, ishte vetë Konte që pranoi se e ardhmja te Interi mund të jetë edhe pa të.
Megjithatë tani duket se presidenti kinez, Zhang ka konfirmuar trajnerin për të paktën edhe vitin e ardhshëm, ndërsa tani priten lëvizjet në merkato për të përforcuar skuadrën dhe për të provuar fitimin e trofeve, që zikaltërve u mungojnë prej disa vitesh, si në Itali, ashtu edhe në arenën ndërkombëtare./Bl.Ba/Fjala.al
