Një djalë pesë vjeçar nga Telford i Britanisë ndihmoi për të shpëtuar jetën e nënës së tij pasi telefonoi shërbimet e urgjencës, duke përdorur numrin e ambulancës që ishte stampuar tek lodrat e tij.
Josh Chapman bëri thirrjen nga shtëpia ku gjeti nënën e tij, Caroline, e shtrirë në dysheme pasi ajo kishte përfunduar në gjendje kome diabetike.
Pasi telefonoi numrin 112, që ishte numri që fëmija dalloi në ambulancën e tij lodër, ai u lidh me një operator komunikimi policie.
Numri i telefonit 112 është në të vërtetë numri i vetëm evropian i urgjencës i cili siguron të njëjtin qëllim si 999.
Menjëherë pas marrjes së telefonatës, oficerët arritën dhe gjetën Joshin dhe vëllain e tij të vogël në shtëpi dhe nënën e tyre që ishte shtrirë pa ndjenja në dysheme. Mjekët e urgjencës ishin në gjendje të kuronin nënën e tij./Bl.Ba/Fjala.al
