“Ferrari” po përgatitet për dy garat e ardhshme, tepër të rëndësishme, në Monza e Muxhelo, ku edhe do të festohet gara e 1,000-të në Formula 1. Dy gara që parashikohen të vështira, duke parë edhe paraqitjet e dy makinave të kuqe deri tani në Botërorin e këtij viti në Formula 1. Për Sebastian Fetelin do të jetë hera e fundit që do të garojë me skuadrën e Maranelos në Çmimin e Madh të Italisë. E për të do të ketë shumë emocione. Vetë piloti gjerman pranon se do t’i mungojnë shumë tifozët në Monza.
“Do të jetë e trishtuar të mos shohësh tifozët në Monza, është hera e parë, – ka rrëfyer ai. – Në këto vite, kam qenë i rrethuar nga dashuria e tifozëve të “Ferrari”-t, në Itali në mënyrë të veçantë. Mendoj se do të jetë e vështirë të shikosh gjithë këta njerëz, duke e ditur se do të jetë hera e fundit që garon me të kuqe. Në këtë aspekt mendoj se do të jetë më e lehtë ta kaloj këtë situatë, pa tifozë.” Më tej, Feteli ka theksuar se kujtimi më i bukur për të ka qenë, fitorja e parë në Malajzi. Kanë ardhur edhe fitore të tjera më pas, por siç thonë, e para është speciale.
Ai ka thënë fjalët të mira edhe për shokun e skuadrës, Sharl Lëklërk. “Ai është një djalë i mirë, po bën një punë të mirë me makinën dhe ka shumë talent, – ka thënë piloti gjerman. – Gjithçka që shkruhet për të e ka merituar. Në të ardhmen do të duket se çfarë do të tregojë. Mendoj se është piloti më i shpejtë dhe më i talentuar i momentit.” Në fund, Feteli ka folur edhe për situatën që po kalon “Ferrari”. “Nuk kemi patur asnjëherë paketën e duhur motorike për të luftuar për titullin, – ka pohuar 33-vjeçari. – E kjo ka ndodhur për shumë arsye, jo për një.”
“Roli im është t’i jap makinës, e të provoj ta zhvilloj atë drejt përsosmërisë, – ka vijuar ai. – Kam kërkuar ta shtyj skuadrën në këtë drejtim. Kemi qenë mirë bashkë, kemi bërë gara të bukura e të tjera jo të mira. Jam sigurisht një tifoz i madh i “Ferrari”-t. Ka qenë gjithnjë ëndrra ime të isha pilot i “Ferrari”-t. Ka qenë një privilegj ta realizoj këtë. Por tani do të shikoj të ardhmen”. Për planet e të ardhmes, Sebastian Fetel nuk ka thënë asnjë të qartë, nëse do të vazhdojë sërish të garojë në Formula 1 apo do të tërhiqet.
La.Mi/Fjala.al
