Një ngjarje e rëndë është shënuar në Rusi të dielën, ku 22-vjeçari, Egor Zhukov, bloger dhe aktivist i njohur për të drejtat e njeriut, është qëlluar nga dy persona që i zunë pritë para banesës së tij, pak para se të largohej me një motor.
Zhukov nuk është një emër i panjohur në Rusi, pasi një vit më parë u shndërrua në simbol të protestave atje.
Stafi i tij i punës postoi foto të 22-vjeçarit me fytyrë të gjakosur, sy të fryrë dhe buzë të çara në disa media sociale. Pavarësisht dëmtimeve, Egor u shfaq i qetë.
Diagnoza e tij tregon për tronditje në kokë.
Aktivisti i njohur dhe blogeri Zhukov u arrestua në gusht të vitit 2019 për pjesëmarrje të paligjshme në protesta kundër përjashtimit të kandidatëve të pavarur nga zgjedhjet në Duma në Parlamentin e Rusisë.
Ai u dënua për organizim të protestave të dhunshme. Dënimi i tij u komentua gjerësisht në Rusi ndërsa shoqëria civile u mobilizua për lirimin e tij.
Në fund të procesit, ai u dënua për nxitje të ekstremizmit, veçanërisht në katër materiale video të publikuara në vitin 2017, të cilat përmbanin disa imazhe të protestave kundër qeverisë.
Zhukov u dënua në dhjetor me tre vjet burg, mirëpo më vonë u lirua me kusht, ndërsa u komentua si një fitore në Rusinë e sotme.
Moska kishte urdhëruar mbylljen e kanalit të tij në YouTube për dy vjet.
Zhukov punon për Radio Echo të Moskës. /Er.Ke/Fjala.al
