Ndahet nga jeta epidemiologu Memo Boçi, mjeku që ndërtoi programin e parë të parandalimit të HIV/AIDS në Shqipëri duke parandaluar një katastrofë në vend.
Lajmin e ka dhënë mjekja Silva Bino e cila mes trishtimit për ndarjen e tij nga jeta, kthehet pas në kohë duke kujtuar kohën kur ishte ende studente.
Ajo e cilëson Boçin një njeri që përqafonte çdo gjë të re dhe i papërtuar për të ndihmuar të rinjtë.
“Mbaj mend që ishin ditë me shi dhe ishte shkurt 1988. Prisja se kush do të ishin anëtaret e komisionit të provimit pasuniversitar të epidemiologjisë. Në atë kohë sëmundjet infektive dhe higjena siç quhej ishin një departament por ndërsa për sëmundjet infektive ishin profesorët e infektivit për epidemiologjinë duhej një komision më i gjerë.
Do të jetë Memo Boçi më thanë i cili në atë kohë ishte Drejtor i Përgjithshëm i Higjienës dhe Epidemiologjisë në MSH. Do ta vendosë ai se ku dhe kur.
Më në fund u la data 29 Shkurt. Memo Boçi ishte legjenda e programeve dhe punëve të higjienës dhe parandalimit. Dr.Memo zakonisht vendoste që këto provime të kryheshin në Institutin e Higjienës si vendi kyç i parandalimit dhe ashtu u bë.
Ishte aq miqësor dhe i qeshur dhe ma hoqi menjëherë ankthin e provimit. Pyetja e parë ishte se pse kisha zgjedhur këtë nëndegë dhe pastaj vazhduam me tezat e provimit.
Më pas më la një detyrë të veçantë të shoqëroja një konsulent të famshëm të OBSH të HIV/AIDS Dr.Daniel Tarantolen në vendet e sterilizimit të shiringave dhe më lejoi të merja pjesë në takimin përfundimtar me të ku u tha qartë se çfarë katastrofe e priste Shqipërinë po të mos merreshin disa masa. Të cilat një për një Dr.Memo u përpoq aq shumë dhe u morën qysh nga depistimi i gjakut, shiringat me një përdorim etj. Këto që ne sot i marrim të mirqena u vendosën me shume mund nga Dr. Memo Boçi.
E më vonë kur ne do të paraqiteshim në konferencën për AIDS në Lisbonë në vitin 1990 ishte ai që pas asnjë ngurim na vuri në dispozicion materialet që prezantimi Shqipërisë të ishte sa më dinjitoz. Ishte Memo Boçi personi që me dedikim nuk lejoi që Shqipëria të pësonte katastrofë nga HIV/AIDS dhe që ndërtoi programin e parë të parandalimit të HIV/AIDS në vend.
Dr.Memo ishte një person që përqafonte çdo gjë të re dhe nuk përtonte të ndihmonte të rinjtë. Ishte një model i njeriut punëtor e të përkushtuar në fushën e parandalimit. Kurioz nga natyra dhe me etjen për të mësuar në çdo kohë themeloi shoqatën Stop AIDS që u bë paranoja e shoqërisë civile për HIV/AIDS.
Një burrë i mençur dhe plot forcë që do të na mungojë shumë. Shpresuam shumë që do ja dilte por nuk mundem. Pusho në paqe profesori ynë tu kesh lënë uratën djemve Arianit që nuk tu nda më shërbimin e tij, Jonës e mbesave”, shkruan Bino./Bl.Ba/Fjala.al
