Gjykata e Krimeve të Rënda vendosi shtyrjen më 8 shtator të vendimit për çështjen e 613 kilogramë kokainë të fshehur në banane që u kap dy vjet më parë në portin e Durrësit.
Avokati i Armando Pezakut, Arben Prenga ka paraqitur mbrojtjen në Gjykatën e Posaçme duke kërkuar pafajësi.
Të pandehurit e tjerë, Arbër Çekaj e Donaldo Lushaj, kanë paraqitur kërkesën për shtyrje pasi avokati Maks Haxhia ka paraqitur raport mjekësor.
Në këtë seancë do të lexoheshin konkluzionet përfundimtare të mbrojtjes por ai ka kërkuar që kjo të bëhet në prani të medias dhe gazetarëve. Seancat në gjykatat shqiptare për shkak të pandemisë zhvillohet pa praninë e publikut.
Çekajt dhe Lushajt u është caktuar avokat kryesisht nga gjykata, ndërsa seanca e radhës është caktuar në datën 8 shtator.
Për gati një vit me radhë seancat për këtë proces gjyqësor vijojnë të shtyhen pasi avokatët e Çekajt dhe Lushajt kanë paraqitur arsye të ndryshme, çfarë e ka bërë të pamundur zhvillimin e procesit i cili ka ngecur në fazën e paraqitjes së pretencave të mbrojtjes dhe shpalljes së vendimit.
Ngarkesa me 613 kg kokainë, është sekuestruar në portin e Durrësit në shkurt të vitit 2018 në dy kontejnerë të mbërritur me banane nga vendet e Amerikës latine./Bl.Ba/Fjala.al
