Një mungesë 9-mujore, që në vend që të krijojë largësi, e ka afruar edhe më tepër grupin e Kombëtares. Kështu ka deklaruar kapiteni kuqezi, Elseid Hysaj, duke folur të enjten në konferencën për shtyp në Bjellorusi.
“Jemi bashkuar si më përpara, – ka deklaruar ai. – U bënë shumë muaj që nuk jemi takuar. Të them të drejtën na kanë bërë mirë, pasi na ka bërë të ndjemë mungesën e kombit. Kjo mungesë e gjatë mendoj se na ka afruar më shumë me njeri-tjetrin.”
Futbollisti shkodran ka falënderuar të gjithë ata që kanë kontribuuar në Kombëtares, ndërsa ka vlerësuar evolucionin e grupit. “Dua të falënderoj Mavrajn dhe Bashën për atë që kanë dhënë në Kombëtare, por futbolli kështu është, vjen një moment kur secili do largohet kur e shikon të arsyeshme, – ka thënë ai.
– Mendoj se kemi të rinj të talentuar dhe mund të ecim shumë me ta. Me të rinjtë po mundohemi t’i fusim në grupin tonë dhe po ju japim një dorë për tu ambientuar me Kombëtaren.”
“Ne po nxjerrim shumë lojtarë të rinj, të cilët kërkohen nga ekipe të rëndësishme, – ka vijuar Hysaj. – Janë lojtarë të rinj dhe duhet të mësojnë shumë. Janë të rinj dhe e kuptojnë futbollin, po futen në grupin tonë.” 26-vjeçari ka folur edhe për formën e tij fizike, duke pohuar: “Forma ime nuk është 100% pasi një javë kam që nisa stërvitjen. Ekipi kundërshtar ka filluar kampionatin, ndërsa ne jo. Ne duhet të kuptojmë kur të sulmojnë e kur të mbrohemi. Kështu që, do të kemi disi probleme në formën fizike.”
“Kam provuar shumë role të ndryshe me ekipin e Napolit dhe Kombëtaren, – ka thënë futbollisti kuqezi sa u përket skemave. – Besoj se mund të ambientohem. Kam eksperienca që kam e kuptoj si duhet të përshtatem në çdo rol. E rëndësishme është që ta fillojmë mirë ndeshjen e parë. Duhet ta fillojmë mirë. Jemi gati të luftojmë për 3 pikë”, – ka përfunduar kapiteni i Kombëtares, Elseid Hysaj.
