Kryeministri Rama shpalli ambicien për një mandat të tretë qeverisës, duke përzgjedhur edhe grupin e të besuarve që do të drejtojnë fushatën zgjedhore në 12 qarqet e vendit. Cili mendoni se do të jetë “kali i betejës” për të kërkuar një mandat tjetër 4-vjeçar në zgjedhjet e vitit 2021?
Rama dhe “rilindasit” në përgjithësi njihen për populizëm dhe vetëmishërim deri në marrëzi. Jo rrallë herë gjatë këtyre viteve kemi parë një kryeministër, që edhe kur drejtimi i vendit dukshëm shkon drejt humnerës, ai është justifikuar me shprehjen: “kush punon, edhe gabon”! Në këtë kontekst, pritet që edhe këtë herë, ashtu si në 2017-n, PS-ja të mos fokusohet fare te ndonjë program konkret, të cilin as e ka pasur dhe zor se do ta ketë, por më së shumti te folklorizmat dhe batutat bajate të Ramës. Sakaq, edhe ndryshimet në qarqe, duke përzgjedhur më së shumti personazhe politike, përkundrejt ministrave me eksperienca minimale në fushata, të bën të besosh se kryeministri e ka kuptuar më së miri se “votuesi i tij” parapëlqen “estradën” përpallë realitetit dramatik.
Në më shumë se 7 vite kryeministër, si do ta komentoni qeverisjen “Rama”, cili është bilanci i tij, arritjet dhe dështimet?
Arritja më e madhe e Ramës dhe qeverisjes së Rilindjes ka qenë dhe mbetet propaganda. Askush më mirë sesa Rama nuk ka ditur që ta shesë edhe dështimin si një arritje ose, më e pakta, si një gabim i ardhur për “faj të Berishës”. Thuajse asgjë nga çfarë u tha gjatë fushatës zgjedhore të 2013-s nuk është konkretizuar në 7 vite qeverisje, të mbyllura me korrupsion galopant, plantacione pa fund me kanabis, në një shtet pa Gjykatë Kushtetuese, pa Gjykatë të Lartë dhe me një parlament në mediokritet total.
Në këto 29 vite demokraci mandati i dytë qeverisës sjell një lodhje nga pushteti. A po shfaq edhe PS-ja shenja të tilla dhe si mundet në 8 muaj para zgjedhjeve t’i rekuperojë problemet me të cilat është përballur të paktën në mandatin e fundit?
Nuk është se mandati i dytë qeverisës sjell lodhje më shumë sesa fakti që asnjë qeveri nuk ka mundur ta qeverisë këtë vend, pa zhytur gjithë grykësi duart në korrupsion. Në këtë kontekst, me gjasë, PS-ja mban një rekord unikal, pasi zor se mund të gjenden shpërdorime të fondeve publike, sidomos me PPP-të, më shumë sesa gjatë qeverisjes së Ramës.
Sipas jush, sa shanse reale ka për një mandat të tretë qeverisës Rama?
Në kushte normale Rama duhet të kishte zero shanse për një mandat tjetër qeverisës. Në kushtet aktuale: me një administratë tejet të fryrë (e gjeti me 115 mijë e ka çuar 170 mijë); me një pushtet vendor tërësisht të njëanshëm (60 nga 61 bashki të PS-së, me një numër mbi 130 mijë punonjës); dhe me një opozitë në gjumë letargjik, që duket se pushtetin do ta marrë në tavolinë, vetëm sepse “i ka ardhur radha”, “Rilindja” ka po aq shanse të fitojë, sa edhe opozita e Basha-Kryemadhi.
