Një protestë u zhvillua sot pasdite përpara Kryeministrisë për fëmijët shqiptarë të mbetur në Siri.
Të afërmit e 50 të miturve, të cilët po përjetojnë ferrin mbi tokë, kërkojnë që shteti shqiptar të interesohet dhe t’i kthejë ata në gjirin familjar. Në mënyrë simbolike u vendosën 60 çanta boshe, si dhe disa pankarta, në shumicën e të cilave shkruhej: Të harruar në Siri, ktheni fëmijët tanë në Shqipëri.
Ndër personat që mori fjalën në protestë ishte daja e Eva dhe Endri Dumanit, vajzës dhe djalit që u dërguan nga i ati në Siri në vitin 2014 për të luftuar në krah të grupit ekstremist ISIS.
Ai e kishte të pamundur të kontrollonte lotët, teksa i bënte thirrje të gjithë institucioneve, sikundër kryeministrit Edi Rama, që fëmijët të kthehen sa më shpejt në Shqipëri.
“Ka kush i pret, ka kush i edukon, kush i mbështet, nuk janë vetëm”, u shpreh ai, i vetmi pjesëtar i familjes Dumani që gëzon komunikim telefonik me Evën dhe Endrin. “Komunikimi i fundit me me mbesën ka qenë para dy orësh, dhe e vetmja gjë që më thotë është se do të vijë një ditë që do t’i marrë shteti, apo jo”, vijoi ai.
Protesta e organizuar nga familja Dumani, zgjati thuajse një orë. Gëzoi intensitet të vakët, kjo për shkak të forcave policore që u bënin thirrje pjesëmarrësve të protestës që të respektonin si masë anti-Covid distancimin social.
