Artisti i njohur nga Kosova, Çun Lajçi ka ndërmarrë një “udhëtim-revoltë” në qytetet e Shqipërisë si kryengritje ndaj klasës politike në Kosovë dhe Shqipëri.
Së fundmi Lajçi ka qenë në qytetin e Shkodrës, ku ai i vendosur në pedonale ka shitur librat e tij dhe ka diskutuar me qytetarët për përmbajtjen e librave dhe tema të ndryshme sociale.
“Bastardët” ishte libri që printe në udhëtimin-revoltë të artistit të spikatur ndaj udhëheqësisë në Kosovë e në Shqipëri .
“Kam dalë me tre romane e një përmbledhje poezie. ‘Bastardët’ komunikon me ngjarjet e fundit që kanë ndodhur në 9 muajt e fundit në Kosovë dhe Shqipëri. Nuk i kam përzgjedhur personazhet pasi kanë përzgjedhur vetveten. Bastardët e kanë vendin në koshat e plehrave”, është shprehur Lajçi.
Artisti bën thirrje që nuk duhet të pranojmë çdo gjë që na serviret.
“Nese ta rrënojnë Teatrin, beje Teatrin në pedonale. Nese je artist bëhu gati të argëtosh veten. Marr sharkinë me vete pasi dua t’i kthej besimin vetes. Nuk duhet të pajohemi me gjithçka që na serviret. Rebelizmi do ishte një thirrje për të gjithë të pakënaqur”, është shprehur Çun Lajçi./Jo.Be/Fjala.al
