Ka rezultuar një zhgënjim përballja e turit të dytë të Ligës së Evropës për Teutën, që ka kapitulluar me shifrat 0-4 përballë Granadës. Pjesa e parë e takimit të luajtur pasdite të enjten në Stadiumin “Niko Dovana” ka nisur në mënyrën më të keqe për durrsakët, pasi spanjollët shënojnë dy herë brenda 10 minutave të para.
Fillimisht është Soldado, i cili merr një pasim nga Kenedi dhe godet bukur me një kthesë nga brenda zonës duke përshëndetur rrjetën e portës së gardianit durrsak, Frashëri. Spanjollët do të vijojnë të sulmojnë përballë Teutës së shtangur dhe do të shënojnë edhe golin e dytë me autor Kenedin, i cili përfiton nga gabimi në mbrojtje i durrsakëve dhe thellon epërsinë e miqve. Teuta nuk është në fushën e lojës, aty ku ligjin e bëjnë iberikët, të cilët gjejnë edhe golin e 3-të pas një gjysmëore lojë.
Herrera mposht Frashërin me një goditje qendrore në hyrje të zonës, pas pasimit të Kenedit. Vetëm pasi ka pësuar 3 gola, Teuta nis të zgjohet dhe në 5 minutat e fundit të pjesës së parë, është fillimisht Vila, e më pas Krasniqi e në fund Daja, që përpiqen të rrezikojnë portën mike, por pa rezultat, sepse 45 minutat e para do të mbyllen me epërsinë e 3-fishtë të Granadës. Ato të dytat do të nisin praktikisht me gol, sepse, pas vetëm 15 sekondash lojë, spanjollët do të gjejnë edhe golin e 4-t, me anë të Herrarës, i cili firmos kështu dygolëshin e tij në këtë takim.
Teuta mundohet të shpëtojë diçka nga ky takim, por as Gruda, as Arapi më pas nuk arrijnë të gjejnë kuadratin e portës mike, ndërsa çdo shpresë e durrsakëve për një reagim do të shuhen 10 minuta para fundit të kohës së rregullt, kur Fabjan Beqja ndëshkohet me kartonin e dytë të verdhë dhe lë skuadrën me 10 lojtarë. Ndeshja nuk ka më histori në vijim, pasi Granada fiton me shifrat 4-0 dhe vijon për më tej, ndërsa Teuta i jep këtu lamtumirën Evropës.
