Falsifikoi kundrejt fitimit formularët për hyrjen në Greqi të 33 shqiptarëve, arrestohet një person nga Pogradeci.
Policia e Korçës bëri arrestimin në flagrancë të Eduard Balliut, 41 vjeç, banues në Pogradec.
Ndalimi i tij u bë pasi punonjësve të Policisë Kufitare Kapshticë, në dalje të Republikës së Shqipërisë, gjatë verifikimit dhe kontrollit të dokumentacionit të 33 shqiptarëve dhe konkretisht të formularëve të hyrjes për në shtetin grek, iu kanë lindur dyshime se mund të ishin dokumente të falsifikuara.
Gjatë veprimeve të mëtejshme hetimore e proceduriale, rezultoi se 41-vjeçari Balliu, nëpërmjet mashtrimit, iu kishte plotësuar formularët këtyre shtetasve në agjencinë e tij në qytetin e Pogradecit, duke përfituar për secilin prej tyre shumën nga 1000 deri në 1500 lekë të reja.
Ndaj të ndaluarit hetimet janë në vijim, ndërkohë që materialet iu referuan Prokurorisë së Korçës, për veprat penale “Mashtrimi, kryer më shumë se 1 herë” dhe “Falsifikimi i dokumenteve”./Bl.Ba/Fjala.al
