Ditën e djeshme Voltana Ademi bëri me dije që ishte e infektuar me koronavirus. Kryebashkiakja e Shkodrës ka bërë me dije për të gjithë qytetarët dhe mediat të cilët janë interesuar për shëndetin e saj se ajo ndodhet në gjendje të mirë shëndetësore dhe se aktualisht po vijon punën nga shtëpia. Ademi shprehet se kolla është e vetmja simptomë që ajo ka për fat të mirë.
“Ju falënderoj për interesimin për shëndetin tim. Përfitoj nga rasti të falënderoj të gjithë miqtë e mi gazetarë, drejtues mediash me të cilët kam bashkëpunuar në vite dhe janë interesuar përmes telefonatave apo mesazheve. Njëkohësisht falenderoj të gjithë familjarët e të afërmit, kolegët në punë, qytetarë që më kanë telefonuar e derguar mesazhe mbështetëse. Dje në mëngjes kam marrë përgjigjen që jam pozitive me Covid-19. Një ditë më parë, të hënën, kam patur pak kollë dhe pak temperature të shtuar. Në këto kushte, e pashë me vend që të bëja testin. Për sigurinë e familjarëve e bashkëpunëtorëve të mi, por edhe timen.
Fatmirësisht, përveç kollës, aktualisht nuk kam simptoma të tjera. Jam në shtëpi, ku vazhdoj punët e përditshme në komunikim me zv kryetarët dhe drejtuesit në bashki, për do gjë që ata e vlerësojnë të nevojshme mbështetjen dhe vendimmarrjen” është shprehur Ademi.
Për sa i përket pyetjes se ku mund të jetë infektuar Voltana Ademi ka deklaruar se mund të jetë infektuar gjatë punës në terren.
“Ka disa ditë, ndoshta dy javë, që për shkak të angazhimeve lidhur me disa projekte që po zbatojmë në fshatra e në qytet, nuk kam qenë shumë e pranishme në mjediset e Bashkisë. Kam punuar e lëvizur në territor, dhe infeksionin mund ta kem marrë përmes kontaktit në terren. Për hir të realitetit, kam takuar njerëz, edhe pse jam përpjekur maksimalisht të ruaj distancën dhe të përdor maskën gjatë gjithë kohës”, tha Ademi/Jo.Be/Fjala.al
