Kush do jenë kandidatët për deputetë në listat e Partisë Socialiste. Bledi Çuçi anëtar i Kryesisë së PS ka zbuluar gjatë emsonit HARD TALK NGA ROLAND QAFOKU, një detaj për listat. Sipas tij, do të ketë surpriza në emrat e kandidatëve për deputetë.
-Unë po ju them edhe një herë. Në një sistem ku në fletën e votimit, shtetasi, do votojë për partinë politike dhe preferencën për kandidatin, do të thotë që lista është e hapur. Lista është e hapur sepse ti nuk voton vetëm për partinë politike por voton dhe për kandidatin brenda partisë politike përkatëse që ti ke votuar. Dhe kjo është listë e hapur. S’ka si të jetë e mbyllur.
-Pse renditja e kandidatëve të mos bëhet sipas alfabetit, ashtu siç e kërkon edhe zoti Basha?
-Çdo parti politike ka preferencën e vet brenda. Ju do t’i hiqni të drejtën partisë politike të rregullojë veten? Ne themi kështu: Ne në procesin e bërjes së listave, arrijmë në një konkluzion hd enë një renditje të kandidatëve. Për nga pesha politike, rëndësia, aftësitë e kandidatit, formimi i kandidatit. Ne bëjmë një renditje. Por këtë renditje ne e ballafaqojmë dhe njerëzit mund ta përmbysin këtë renditje.
-Kush është e reja në hartimin e listave?
-Teorikisht hapja e listave sigurisht që mund të zgjojë një interes më të madh në mjedisin politik lokal. Meqë ne kemi sistem proporcional rajonal në bazë të qarqeve kështu që mund të zgjojë jë oreks politik edhe të personazheve që mund të jenë personazhe me autoritet në një komunitet të caktuar, por që duke qenë se i dukej e largët afrimi në një parti politike në nivele drejtuese, për shumë arsye nuk është përfshirë në politikë por që gjithmonë ka menduar, ka vepruar brenda frymës dhe programit të një partie politike, tani ka mundësinë që ndoshta të shprehë interesin sepse edhe po të jetë në pjesën e fundit të listës , duke pasur autoritet ka mundësinë që të dalë dhe ta thyejë dhe të bëhet deputet.
-Ju a keni menduar që listën të mos e hartoni vetëm me figurat e njohura të PS?
-Po sigurisht. Kjo është le të themi edhe një hapje partie.
-I bie që do kemi surpriza në emra.
-Do dalin dhe emra të rinj./Fjala.al/Ke.Ba
