Ministrja e Shtetit për Marrëdhëniet me Parlamentin, Elisa Spiropali është përplasur me deputeten Rudina Hajdari gjatë seancës së sotme parlamentare.
Gjatë fjalës së saj nga foltorja Kuvendit, deputetja Hajdari akuzoi mazhorancën dhe kryeministrin Edi Rama se ka mashtruar me listat kur është shprehur se do të hapen 100 %.
Duke i bërë thirrje të tërhiqen, Hajdari e mbylli fjalën e saj në foltoren e kuvendit duke thënë se koha e tyre ka mbaruar.
“Rama mashtroi për listat e hapura. Do të renditet si një nga mashtrimet më të mëdha. Deputetët në Kuvend i cakton prapë kryetari. Si mund ta bëni këtë. Si i mashtroni qytetarët?
Unë e kam një përgjigje. Ju keni frikë nga populli se jeta juaj është luksoze dhe ju e dini si e përballoni ndërkohë që pjesa dërrmuese e qytetarëve zvarriten nëpër rrugë për të gjetur një punë.
Pse mbroheni në listat e kryetarëve tuaj prandaj jeni këtu. Ka dy rrugë ose të tërhiqni propozimin dhe të humbisni me dinjitet ose të vazhdoni me këtë propozim por dijeni mirë koha juaj ka mbaruar”, tha Hajdari.
I menjëhershëm ka qenë reagimi nga Elisa Spiropali e cila i ka kërkuar deputetes Hajdari që të mbajë gojën.
“E nderuar Rudinë mbaj gojën. Vëri fre vetes. Nuk të kemi asnjë borxh. Broçkullit pa sens. Nëse do të flasësh për lista e zgjedhje ti nuk je e votuar. Ke hyrë në lista.
Dil tani, provoje, pije detin, hyri detit në këmbë të shohim ku do të dalësh, në breg apo në anën tjetër”, tha Spiropali./Bl.Ba/Fjala.al
