Real Madrid e ndjen shumë mungesën e fitoreve me goleadë, pasi largimi i Cristiano Ronaldos në vitin 2018 , për hir të së vërtetës, la një hendek të madh në sulm. Me shumë bujë erdhi transferimi i Eden Hazard nga Chelsea, po deri tani fati nuk ka qenë me belgun, i cili ka vuajtur jo pak nga dëmtimet. Ndërkohë edhe blerja tjetër 60-milionëshe, Luka Jovic ka qenë totalisht jashtë forme.
Për këtë Madrilenët po mendojnë për një surprizë të vërtetë në merkato. Një vlerë e shtuar e kampionëve të Spanjës që mund të ndihmojë në këtë drejtim mund të jetë Edinson Cavani.
Uruguajani është aktualisht një lojtar i lirë pasi kontrata e tij me Paris Saint-Germain u mbyll në 30 qershor dhe tashmë Rene Ramos është i ‘dyshuari kryesor’ për të siguruar një lëvizje në Madrid për sulmuesin.
“Cavani i ka dhënë Rene Ramos fuqinë për të negociuar me Real Madrid, jo me ekipe të tjera”, tha Roberto Gomez në Radio MARCA. Ai ka të drejtë të negociojë me ekipin e Zidane si një lojtar i lirë.
“Duket se Madridi nuk do të sjellë askënd, por ne do të shohim se çfarë do të ndodhë me negociatat premtuese të Rene dhe dëshirën e Cavanit, sepse ai dëshiron të luajë tek Real Madrid, skuadra e tij e ëndrave”.
Burimi: Marca
Pa.Va/Fjala.al
