Vitet e fundit për goditjen e grupeve kriminale, autoritetet ligjzbatuese të vendit u janë vënë pas pasurive dhe aseteve që personat e përfshirë në veprimtari kriminale kanë përfituar. Vetëm gjatë këtij viti policia dhe prokuroria, përveç arrestimit të personave që janë përfshirë në trafiqe të ndryshme, kanë sekuestruar edhe pasuritë e tyre, pasuri të cilat kapin shifrat e miliona erove. Gazeta “Fjala”sjell disa nga rastet më të bujshme të pasurive që autoritetet kanë sekuestruar gjatë këtij viti, vlera e të cilave në shtatë muajt e fundit arrin në rreth 30 milionë euro.
Nga Elvis Myrta
Autoritetet ligjzbatuese vendase, por edhe ato ndërkombëtare shpeshherë kanë ndërmarrë disa operacione për goditjen e krimit të organizuar në vendin tonë. Vitet e fundit lufta për goditjen e krimit të organizuar ka qenë në fokusin e qeverisë shqiptare, të BE-së dhe asaj amerikane, ku nuk kanë munguar rastet edhe kur është folur me emra për banda apo njerëz të inkriminar që kontrollojnë territorin shqiptar. Për parandalimin dhe goditjen e grupeve kriminale që operojnë në vendin tonë, përveç zbardhjes dhe dokumentimit të aktivitetit të tyre kriminal, është synuar që atyre t’u sukestrohen edhe pasuritë. Përfitimi i grupeve kriminale nga trafiqet e ndryshme ku ata janë të implikuar, kapin shuma marramendëse që shkojnë në miliona euro.
Për këtë arsye ndërkombëtarët për goditjen e personave që janë të përfshirë në veprimtari kriminale kanë kërkuar hetim të thelluar dhe sekuestrim të pasurive që ata kanë vënë në rrugë kriminale, pasi kjo është e vetmja mënyrë për shfuqizimin e këtyre personave. Vitet e fundit policia në bashkëpunim me prokurorinë për të parandaluar dhe goditur krimin e organizuar, trafkikut dhe korrupsionit ka marrë disa masa parandaluese duke sekuestruar disa pasuri që janë përfituar nga aktiviteti kriminal. Gjatë këtij viti autoritetet ligjzbatuese kanë vënë nën sekuestro pasuri të luajtshme dhe të paluajtshme të personave të ndryshëm që dyshohet se janë përfituar nga aktiviteti i paligjshëm që këta persona kanë kryer brenda apo jashtë vendit. Ditën e djeshme Gjykata e Posaçme e Shkallës së Parë për Korrupsionin dhe Krimin e Organizuar vendosi të konfiskojë 40 për qind të pasurisë së Klement Balilit, i njohur ndryshe si “Eskobari i Ballkanit”. Pasuritë e sekuestruara nga ana e GJKKO-së janë edhe në emër të vëllait të tij Bashkim Balilit. Sipas vendimit të gjykatës, pasuritë e sekuestruara të vëllezërve Balili janë resorti “Santa Quaranta”; dy troje me sipërfaqe totale 13710 m2; 16 apartamente me sipërfaqe ndërtimore totale 940 m2 dhe të një njësi 120 m2.
Për administrimin dhe përdorimin e pronave të konfiskuara gjykata ka ngarkuar Agjencinë për Administrimin e Pasurive të Sekuestruara dhe të Konfiskuara, Tiranë. Kelment Balili, më 7 maj të vitit të kaluar u dënua nga ish-Gjykata e Shkallës së Parë për Krimet e Rënda me 10 vjet burgim për përfshirje në trafikun ndërkombëtar të lëndëve narkotike. Gjatë këtij viti institucioni i akuzës ka sekuestruar disa pasuri që dyshohet se janë përfituar nga aktiviteti kriminal. Autoritetet kanë sekuestruar para cash, si dhe pasuri të luajtshme dhe të paluajtshme, vlera e të cilave kap shifrën e 30 milionë eurove.
Në 7 muaj janë sekuestruar rreth 30 milionë euro
Në korrik të këtij viti prokurori i përgjithshëm, Olsian Çela, ministri i Brendshëm, Sandër Lleshaj dhe ministrja e Ekonomisë, Anila Denaj, nënshkruan një memorandium i cili në fokus kishte rritjen e efektivitetit në hetimet që lidhen me pastrimin e parave, financimin e terrorizimit, krimet financiare dhe sekuestrimin e konfiskimin e aseteve që e kanë prejardhjen nga aktivitetet kriminale.
Përmes këtij memorandumi palët angazhohen të marrin masat e nevojshme mbikëqyrëse, monitoruese dhe koordinuese, sipas kompetencave ligjore, të kryejnë analiza të përbashkëta dhe të shkëmbejnë informacione midis institucioneve me qëllim evidentimin e saktë dhe të plotë të shkeljeve që përbëjnë vepër penale në fushat e pastrimit të parave, financimit të terrorizmit, krimeve financiare dhe kryerjen e hetimeve pasurore për sekuestrimin dhe konfiskimin e aseteve kriminale. Frytet e këtij bashkëpunimi nukmunguan. Menjëherë pas nënshkrimit të memorandiumit, gjatë muajit gusht, u ndërmorën katër operacione për sekuestrimin e parave që dyshohet se e kanë prejardhjen nga krimi i organizuar.
Vetëm gjatë gushtit të 2020-ës, autoritetet ligjzbatuese sekuestruan rreth 17 milionë euro që dyshohet se e kanë prejardhjen nga krimi. Gazeta “Fjala” sjell më poshtë disa nga rastet më të bujshme kur strukturat shtetërore kanë vënë nën sekuestro disa pasuri të personave që janë dënuar më parë apo janë të përfshirë në aktivitet kriminal.
Sekuesrimi i pasurisë së Bledar Seferit dhe një italiani
Më 13 shkurt të këtij viti, me vendim të Gjykatës Speciale, u vu nën sekuestro pasuria e Bledar Seferit dhe e bashkëpunëtorit të tij italian, Giovanni Di Cosimo. Këtyre dy shtetasve iu sekuestrua pasuria, pasi ata dyshohet se janë pjesë e një grupi të strukturuar kriminal në trafikun e lëndëve narkotike, grup i cili operon në Shqipëri dhe Itali. Seferi dhe familjarë të tij u hetuan nga prokurorët e SPAK-ut, të cilët arritën në konluzionin se ata posedonin pasuri të pajustifikuara.
Për këtë arsye, gjykata vendosi sekuestrimin e një fabrike për prodhimin e lëndëve plastike në Shijak, tokë me sipërfaqe 5954 m², nga kjo sipërfaqe ndërtesë 3070 m² në Durrës, një ullishte me sipërfaqe 6550 m² në Tiranë, 6 automjete të markave të ndryshme dhe dy llogari bankare në shumën 3103244 lekë dhe 21022 euro. Pasuritë e sekuestruara të këtyre personave kapin vlerën e 1,5 milionë eurove. Pas sekuestrimit ato u morën në administrim nga Agjencia për Administrimin e Pasurive të Sekuestruara dhe të Konfiskuara, deri në përfundimin e procesit gjyqësor për konfiskimin e tyre.
Sekuestrimi i pasurisë së dy vëllezërve nga Tirana
Më 11 maj policia e Tiranës sekuestroi një pasuri me vlerë prej 3,7 milionë eurosh, që u përkiste vëllezërve Shkëlzen dhe Edmond Hoxha. Sekuestrimi i pasurisë u bë i mundur nga ana e autoriteteve, pasi vëllezërit Hoxha dyshohet se janë të përfshirë në veprat penale të lojërave të fatit, si dhe janë të dënuar në Belgjikë për vepra penale. Në atë kohë në saje të operacionit “Investimi”, policia sekuestroi 4 apartamente në Tiranë, 2 apartamente në Sarandë, 1 ambient biznesi trekatësh në Laprakë; 1 njësi tregtare, 1 palestër, 7 garazhe dhe dy aktivitete biznesi në Tiranë; 4 automjete BMW X5 dhe llogari bankare në euro, usd dhe lek, si dhe gjendjen aktuale në këto llogari në tri banka të nivelit të dytë.
Sekuestrimi i pasurisë së Artan Doçit
Më 8 qershor GJKKO-ja miratoi kërkesën e SPAK-ut për sekuestrimin e pasurisë së Artan Doçajt, i akuzuar si i përfshirë në rrëmbimin dhe zhdukjen e Jan Prengës, në janar të këtij viti. Sipas vendimit të Gjykatës Speciale, nën sekuestro është vendosur një banesë dykatëshe në Shkodër, dy makina, njëra tip “Audi’ dhe tjetra “Chrysler”, si dhe një motor, të cilat rezultojnë në pronësi të Doçajt. Pasuria e sekuestruar ndaj shkodranit kap vlerën e rreth 500 mijë eurove.
Operacioni “Asetet”
Në kuadër të operacionit të koduar “Asetet”, më 11 qershor, një kosovari dhe një polaku iu sekuestruan 2,1 milionë euro pasuri, që dyshohet se e kanë prejardhjen nga krimi. Hasan Lushi, 50 vjeç nga Kosova, banues në Zvicër dhe Ryszard Artur Szylak, 47 vjeç, me origjinë nga Polonia, me banim në Zvicër, paratë e fituara në mënyrë të paligjshme i investonin në Shqipëri. Këtyre dy personave iu sekuestruan 3 apartamente në Tiranë; një njësi tregtare e ndodhur në “Rrugën e Kavajës”; 5500 m2 sipërfaqe toke në Radhimë; asete të një ish-kompanie të transportit ndërkombëtar të mallrave; llogari bankare pranë bankave të nivelit të dytë, në shumën e 240000 eurove dhe 210000 franga zvicerane, si dhe 6 automjete të markave të ndryshme, prodhime të viteve të fundit.
Sekuestrimi i 3,5 milionë eurove pasuri
Dy ditë më pas, prokuroria e Durrësit i sekuestroi një 51-vjeçari rreth 3,5 milionë euro pasuri me dyshimin se burojnë nga aktiviteti kriminal. Më 13 qershor, institucioni i akuzës vuri nën sekuestro dy pallate dhe një hotel, vlera e të cilave shkon në 2 milionë euro. Pasuritë e sekuestruara janë në pronësi të 51-vjeçarit Pëllumb Tuda. Ky i fundit është një emër i njohur për drejtësinë, pasi rezulton i dënuar për “Trafik të lëndëve narkotike” dhe “Shfrytëzim prostitucioni”. Ndërsa një tjetër pasuri me vlerën e 1,5 milionë eurove u vu nën sekuestro pranë zonës së njohur si Shkëmbi i Kavajës. Bëhet fjalë për këtë pallat 9-katësh që është ende në ndërtim, leja e ndërtimit të të cilit dyshohet se është marrë në shkelje të ligjit.
Sekuestrimi i pasurisë së Ylli Ndroqit
Më 3 gusht të këti viti Gjykata e Posaçme e Shkallës së Parë për Korrupsionin dhe Krimin e Organizuar, sekuestroi 26 pasuritë e pronarit të një televizioni në vend, konkretisht Ylli Ndroqit, pasuri që kapin shifrën e milona eurove. Në vendimin e marrë nga GJKKO-ja thuhet se sekuestrimi u bë mbi bazën e dyshimeve që pasuria e tij, që është edhe në emër të familjarëve, dyshohet se është ngritur mbi bazën e aktivitetit kriminal. Dyshimet janë ngritur pas dënimeve që Ndroqi ka pasur vite më parë në Itali e Turqi për trafikim heroine. Hetimet për Ndroqin nisën më 21 korrik të këtij viti, në kuadër të ligjit antimafia.
Sekuestrimi i pasurisë së “bosit” të drogës
Më 8 gusht SPAK-u dërgoi për gjykim Astrit Beqirin, i akuzuar për trafik kokaine në Danimarkë. Ndaj këtij shtetasi gjykata ka vendosur sekuestron për pasurinë e tij, pasuri e cila kap vlerën e 3 milionë eurove. Gjithashtu, për gjykim u dërgua dhe Dhimitër Shkodrani, i akuzuar për pastrimin e produkteve të veprës penale dhe pjesëmarrje në grup kriminal. Operacioni për arrestimin e Astrit Beqirit, pronarit të pularisë “RENS 2015” në Shkodër, u zhvillua më 26 qershor 2019, dhe ishte i shtrirë në 7 shtete të BE-së ku trafikohej kokainë. Një pjesë e parave të fituara nga aktiviteti i drogës pastroheshin në Shqipëri, duke investuar në biznese të ndryshme në Shkodër. Nisur nga kjo situatë, Beqirit i është sekuestruar pasuria e tij, ku përfshihet pularia në Shkodër “RENS 2015”, 6 banesa në Velipojë, një motor tip “Yamaha”, 5 makina dhe 2 furgonë.
Sekuestrimi i pasurisë së Valentin Selajt
Prokuroria e Posaçme Antikorrupsion ka sekuestruar pasurinë e Valentin Selajt, dhe familjes së tij në Lezhë. Sekuestrimi u bë me kërkesë të autoriteteve holandeze, pasi dyshojnë se pasuritë në Shqipëri janë blerë me të ardhura nga trafiku i drogës që banda e Selajt bënte mes Amerikës së Jugut dhe Holandës. Një pjesë të parave të fituara nga trafiku, Selaj i dërgonte në Shqipëri dhe familjarët e tij dyshohet se blinin prona të paluajtshme. Nën sekuestro, nga ana e SPAK-ut u vunë 17 pasuri, si: shtëpi, toka, makina, llogari bankare dhe një biznes në emër të vëllait të Valentinit. Valentin Selaj, i njohur si “zoti i drogës”, ishte drejtuesi i njërës prej bandave më të rrezikshme të trafikimit të kokainës.
Sekuestrimi i 1,3 milionë eurove
Policia e Fierit, më 13 gusht sekuestroi disa apartamente dhe një automjet me vlerë 200 mijë euro, në pronësi të tre qytetarëve, me dyshimin se janë përfituar nga veprimtari kriminale. Apartamentet e konfiskuara dyshohet se janë përftuar nëpërmjet veprimtarisë kriminale në shtetin grek, ku këta shtetas, në bashkëpunim me njëri-tjetrin, në datën 02.05.2011, kanë rrëmbyer një shtetas grek, pronar i një shoqërie tregtare private, me qëllim përfitimi dhe u kanë marrë familjarëve të tij shumën 1 milion e 300 mijë eurove.
Gjatë vitit 2019 u sekuestruan 100 milionë euro
Gjatë vitit 2019 prokuroria në bashkëpunim me policinë ndërmori disa operacione për goditjen e grupeve kriminale dhe sekuestrimin e pasurive të luajtshme e të paluajtshme, të personave të përfshirë në aktivitete të paligjshme dhe trafiqe të ndryshme. Institucionet ligjzbatuese, nën sekuestro vunë pasuritë e të gjithë personat e dënuar apo të vënë nën hetim nga prokuroria për veprimtari të ndryshme kriminale. Shtetasit që iu sekuestrua pasuria më së shumta vuajnë dënime apo akuzohen si të përfshirë në “trafik droge”, “grup i strukturuar kriminal”, “organizatë kriminale”, “zhvatje me dashje”, “shtrëngim për dhënie pasurie”,“trafik armësh” etj. Gjatë vitit që lamë pas krimit të organizuar iu sekuestruan rreth 100 milionë euro. Por, pavarësisht se shuma e parave të sekuestruara është një shifër e lartë, me vendim gjykate vetëm 30% e saj është konfiskuar. Më konkretisht nga 100 milionë euro autoritetet kanë sekuestruar vetëm 30 milionë. Institucionet, edhe pse kohët e fundit në dalje publike janë shprehur se bashkpunimi mes tyre është i frytshëm, për konfiskimin e këtyre pasurive gjithmonë ia kanë pasur “topin” njëra-tjetrës, duke mos marrë përgjegjësi. Edhe gjatë këtij viti paratë e sekuestruara janë sasi të konsiderueshme, por nëse gjykata do të vendosë t’i konfiskojë apo jo ato, kjo vlen për t’u parë. /Ra.My.Fjala.al/
