Më 28 shtator 2018 kryeqyteti gumëzhinte nga tifozët. Luhej derbi Tirana-Partizani dhe në kryqëzimin e “21 dhjetorit” tifozët e Partizanit të veshur me bluza të kuqe parakalonin duke kënduar himnin e skuadrës së tyre dhe e shoqëronin me zhurmën e vuvuzelave.
Tifozeria ishte e flaktë, mbështetësit ishin të shumtë dhe krijohej ideja që gjithçka po ecte normalisht.
Nga ana tjetër tifozeria e Tiranës ishte gjithashtu e zjarrtë, ata kishin shallin bardhë e blu të hedhur në qafë dhe këndonin himnet që lartësonin skuadrën e Tiranës. Përballja ishte e fortë, ishte derbi që në çdo kohë ngjall kureshtje dhe i përfshin të gjithë njerëzit dashur pa dashur.
Sot situata në kryeqytet dhe në të gjithë vendin tonë paraqitet ndryshe.
Fillimisht futbolli u pezullua nga pandemia, gjithçka kaloi në kolaps ndërkohë që ndryshe nga vendet e tjera ku gjithçka ka nisur, Liga Profesionale e Futbollit ka bojkotuar kampionatin.
Vendimi është marrë në mënyrë unanime nga klubet e Kategorisë Superiore, dhe skuadrat do të vazhdojnë të protestojnë deri në përmbushjen e kërkesave drejtuar qeverisë.
Sipas vendimit të marrë edhe në mbledhjen e fundit të Ligës, ditën e shtunë skuadrat e Apolonisë dhe Kastriotit kanë dalë në fushën e stadiumit “Loni Papuçiu” të Fierit dhe i janë drejtuar qeverisë me një mesazh të lexuar nga kapitenët e të dy skuadrave. Më pas skuadrat janë kthyer në dhomat e zhveshjeve.
Protesta do të vijojë në të njëjtën formë edhe të dielën me katër çiftet e tjera të javës së tretë të Kategorisë Superiore sipas kalendarit, më konkretisht Teuta – Kukësi, Vllaznia – Tirana, Bylis – Skënderbeu dhe Partizani – Laçi.
Atmosfera e para dy viteve në Tiranë ishte e bukur dhe gjithëpërfshirëse. Tani në studiot televizive diskutohen vetëm kampionatet e huaja ndërsa për sa i përket futbollit në Shqipëri analiza qëndron tek bojkoti dhe deri sa do të zgjasë kjo gjendje.
Jo.Be/Fjala.al
