GJKKO ka lënë sot në fuqi masën e pezullimit për Artan Shkëmbin, zv.drejtori i Operacionit Forca e Ligjit, pas akuzave për korrupsion dhe nxjerrje sekreti hetimor.
Shkëmbi dyshohet se ka dekonspiruar të dhëna për një grup kriminal që ishte nën hetim nga autoritetet gjermane. Kjo çështje është duke u hetuar dhe ka të ngjarë që të ketë të përfshirë dhe zyrtarë të tjerë të policisë.
Avokati Artan Broci tha se deri më tani ka vetëm dyshime dhe se vetë Shkëmbi është i interesuar për të zbardhur çështjen.
Ai pyet nga gazetarët nëse Shkëmbi kishte përdorur rrjetin EncroChat, një rrjet i sofistikuar i përdorur nga grupi i krimit të organizuar në Evropë, ku janë arrestuar më shumë se 700 persona.
“Nuk ka asnjë provë që zt.Shkëmbi ka qenë përdorues apo pronar i një telefoni. Ka dyshime që ne do t’i verifikojmë. Vetë zt. Shkëmbi është i interesuar për ta zbarhdur këtë çështje. Ka një karrierë 20 vjeçare. Ka drejtuar 178 operacione shumë të suksesshme. U la në fuqi masa për pezullimin nga detyra për të cilën do të paraqesim ankimim”- tha avokati.
Vendimi për pezullimin e tij u mor tre ditë më parë nga Gjykata e Posaçme Kundër Korrupsionit dhe Krimit të Organizuar dhe u pasua nga një urdhër i kryepolicit Ard Veliu.
Artan Shkëmbi, ka mbajtur disa detyra të rëndësishme në policinë e shtetit, ndërsa kandidoi edhe për të marrë drejtimin e Byrosë Kombëtare të Hetimit, por nuk arriti të kualifikohet në fazën e testit të poligrafit.
Në shkurt 2020, ai kaloi me sukses testin e vettingut, pavarësisht probleme që u relatuan nga trupa gjykuese në shtyllën e pasurive dhe figurës morale./Bl.Ba/Fjala.al
