Dy amerikanë të tjerë që përballen me akuza të ngjashme dolën përpara gjykatës në shtetet Minesota dhe Uashington më 16 shtator, tha Departamenti i Drejtësisë.
Sipas deklaratës kjo e çon numrin e përgjithshëm të shtetasve amerikanë të rikthyer nga arresti në Siri dhe Irak në 27. Mes tyre 10 përballen me akuza.
“Shtetet e Bashkuara kanë kthyer në vend çdo mbështetës amerikan të ISIS-it, ndaj të cilëve ne kemi ngritur akuza dhe që mbaheshin nga Forcat Demokratike Siriane”, tha Ndihmës Prokurori i Përgjithshëm për Sigurinë Kombëtare, John Demers.
Forcat Demokratike Siriane të udhëhequra nga Kurdët në Sirinë verilindore mbështeten nga Shtetet e Bashkuara.
Departamenti i Drejtësisë gjithashtu i ka bërë thirrje vendeve të tjera, veçanërisht atyre të Evropës Perëndimore, për të vepruar dhe tha se do t’i ndihmonte ato të marrin “përgjegjësinë për qytetarët e tyre që u larguan për të marrë armët në mbështetje të sundimit të urrejtjes dhe intolerancës së ISIS-it”.
Evropianët përbëjnë rreth një të pestën e 10,000 luftëtarëve të ISIS-it të mbajtur nga milicitë kurde në Siri, por shumë vende evropiane ngurrojnë t’i riatdhesojnë ata nga frika e reagimit publik.
Zyrtarët amerikanë kanë thënë se Shteti Islamik po evoluon nga një grup militant që synon të mbajë territor në Lindjen e Mesme në një rrjet global që shpreson të frymëzojë ideologjinë dhe sulmet ekstremiste diku tjetër. Ru. Do/ Fjala.al
