Një nga lojtarët që doli të hënën në konferencën për shtyp nga Kazakistani, ku Shqipëria po qëndron e akomoduar, në prag të sfidës me Lituaninë që do të zhvillohet ditën e mërkurë, ka qenë Lorenc Trashi. Në fjalën e tij, futbollisti gramshiot, analizoi fillimisht përballjen e së dielës ndaj kazakëve, që u mbyll me rrjeta të paprekura. “Në përgjithësi në aspektin individual, një pjesë e parë e mirë, – ka pohuar ai. – Mendoj që kam bërë mirë në pjesën e parë.”
“Në pjesën e dytë, që të tregohem i sinqertë, nuk u luajt shumë nga krahu i majtë, u përqendrua më shumë loja nga Veseli, – ka vijuar ish-futbollisti i Partizanit. – Nuk është se pata shumë aksione individuale që t’i përfundoja me sukses. Në aspektin e grupit, mendoj që djemtë kanë bërë një ndeshje të mirë, pavarësisht rezultatit. Duhet të shfrytëzonim rastet më të pastra dhe të kishim finalizuar mirë. Edhe i kënaqur jam me një pikë, por në fakt doja dhe u futëm në fushë për 3 pikë.”
“I patëm të gjitha mundësitë për 3 pikët, – ka theksuar lojtari i krahut. – Luajtëm më mirë se kundërshtarët, patëm më shumë raste. Duhet ta kishim fituar këtë takim, por duke parë që do të zhvillohen dhe 3 ndeshje të tjera, besoj që edhe 1 pikë është mirë. Shpresojmë për një fitore me Lituaninë. Debutuesit kanë bërë një ndeshje të mirë, si Broja dhe Kallaku. Me ato që kemi dëgjuar pas ndeshjes, kanë qenë komente pozitive. Kombëtarja besoj se ka fituar 2 lojtarë shumë të mirë.”
“Situata e përgjithshme është e mirë. Gjithçka ka qenë “ok” pas ndeshjes. Kemi përgëzuar çunat për lojën. Kemi thënë që duhet të jemi me kokën lart dhe duhet të jemi të përqendruar për të marrë maksimumin e pikëve”, – ka përfunduar futbollisti i Kombëtares kuqezi, Trashi. Kombëtarja shqiptare është rikthyer në stërvitje të hënën paradite në ish-kryeqytetin e Kazakistanit, Almati, teksa kanë nisur edhe përgatitjet për udhëtimin drejt Lituanisë.
la.mi/Fjala.al
