Shoqata e Botuesve Shqiptarë njoftoi se edicioni i 23-të i Panairit të librit në Tiranë do të anulohet për shkak të koronavirusit.
Edicioni i 23-të i panairit të librit ishte parashikuar të zhvillohej nga data 12-15 nëntor 2020, por Ministria e Shëndetësisë e ka ndaluar për shkak të rrezikshmërisë së lartë të përhapjes së virusit.
“Të dashur kolegë botues, librarë, ekspozues, pjesëmarrës në Panairin e Librit të Tiranës, ju vëmë në dijeni që, pavarësisht gjithë interesimit tonë dhe përgatitjeve për të bërë të mundur organizimin e Panairit të 23 të Librit, sipas planifikimit më 12-15 nëntor 2020, përgjigja që erdhi sot, dt. 14.10.2020, nga Ministria e Shëndetësisë dhe e Mbrojtjes Sociale, ështe negative, për shkak të “rrezikshmërisë së lartë në përhapjen e Covid-19 gjatë këij aktiviteti, në situatën në të cilën ndodhemi”.
Ju falënderojmë të gjithëve për mirëkuptimin dhe mbështetjen dhe ju urojmë punë të mbarë”, thuhet në njoftimin e grupit organizator.
Ndërkohë, ditën e sotme ministria e Shëndetësisë njoftoi rihapjen e kinemave pas 7 muajsh, por gjithçka do të bëhet nën protokollin që do të hartohet nga autoritetet shëndetësore. Kujtojmë që ditën e sotme në vend është shënuar rekord shifrash me 5 viktima dhe 203 raste të reja.
Pa.Va/Fjala.al
