Botërori i Motoçiklizmit ka zhvilluar të dielën garën e 10-të të këtij sezoni, që, si çdo fundjavë, erdhi drejtpërdrejt në Rrjetin e Radio-Televizionit Shqiptar. Dhe ka qenë Aleks Rins ai që ka triumfuar në aktin e parë të dy garave që do të zhvillohen në pistën e Aragonit.
Të dielën është zhvilluar akti i parë i dy garave të njëpasnjëshme që do të zhvillohen në pistën e Aragonit në Spanjë dhe i gjithë podiumi ka folur spanjisht, teksa i pari në finish ka mbërritur piloti i “Suzuki”-t, Aleks Rins, i ndjekur nga ai i “Honda”-s, Aleks Markez, dhe piloti tjetër i “Suzuki”-t, Joan Mir.
Siç dihet, në këtë garë mungoi 9-herë kampioni i botës, Valentino Rosi, i cili, pak ditë më parë, është bërë piloti i parë në nivelin më të lartë të Kampionatit Botëror të Motoçiklizmit, Moto GP, që do të mungojë në një garë për shkak të rezultimit pozitiv për virusin Covid-19.
Veterani italian do të mungojë në garën e fundjavës në Aragon, por edhe në garën tjetër, që do të mbahet një javë më pas po në të njëjtën pistë. Ndërkaq, gara e së dielës pa Aleks Rinsin të fitonte betejë me Markezin e ri, ndërsa një pasdite e mjerë për Fabio Kuartararon, i cili nuk shkoi dot më larg se vendi i 18-të, i lejoi Joan Mirit të merrte kryesimin e renditjes së përgjithshme të pilotëve.
Epërsia e Kuartararos në krye të renditjes para kësaj gare ishte 10 pikë, por rezultati i tij në Aragon, më i keqi i këtij sezoni, i ndërthurur me një vend të 3-të për Mirin, nënkupton se francezi i “Jamaha”-s kliente të “Petronas”-it është 6 pikë pas spanjollit, ndërsa vetëm 15 pikë i ndajnë 4 të parë nga njëri-tjetri.
Pa.Va/Fjala.al
