Presidenti Ilir Meta ka replikuar me analistin Agron Gjekmarkaj pas kritikave të këtij të fundit për dhënien e dekoratave.
Nëpërmjet një statusi në facebook Meta ka shkruar se dhënia e dekoratave është detyrimi ynë moral, si dhe i çdo gjenerate shqiptare, ndaj historisë dhe së ardhmes të kombit tonë.
Meta ka shkruar që presidenti i Republikës, si asnjë institucion tjetër në Republikën e Shqipërisë e ka të sanksionuar në Kushtetutë të drejtën për të dhënë dekorime.
Presidenti në një shkrim të gjatë sqaron se ka synuar të evidentojë aktet, kontributin ndaj kombit dhe ngjarjet më të shënuara.
“Në të gjitha rastet, më shumë se për emrat, kam synuar të evidentoj aktet, kontributin ndaj kombit dhe ngjarjet më të shënuara, të cilat kanë mishëruar pikat më të shndritshme të historisë sonë për liri e pavarësi”, ka shkruar Meta në facebook.
Kreu i shtetit shkruan më tej që figurat e Heronjve, Dëshmorëve apo Atdhetarëve të dekoruar, përherë kanë qenë të lidhura me interesin mbarëkombëtar dhe janë jashtë këndvështrimit politik aktual apo të kohës në të cilën janë kryer këto akte.
“Për Presidentin e Republikës nderimi për luftëtarët që sakrifikuan dhe flijuan jetën për lirinë e Shqipërisë është shprehja më e drejtpërdrejtë e atdhedashurisë që duhet të mbartë çdo shqiptar, pavarësisht bindjeve politike!”, ka vijuar më tej presidenti.
Presidenti Meta në këtë postim ka sjellë gjithashtu ecurinë e vlerësimeve të një aktiviteti.
Analisti Agron Gjekmarkaj në shkrimin e tij është shprehur: Heronjtë që dekoroi Ilir Meta janë tri mite të së majtës shqiptare. Presidenti pa dyshim që po luan edhe politikisht./Jo.Be/Fjala.al
