Ministri i Shëndetësisë në Maqedoninë e Veriut, Venko Filipçe apeloi dhe një herë tjetër tek qytetarët që të respektojnë masat pasi në të kundërt ekziston mundësia që si hap i ardhshëm të jetë edhe vendosja e orës policore.
“Kufizimi i tubimeve familjare, është një pako që mund të ndikoj në uljen e numrit të të infektuarve. Më lejoni të drejtoj një apel tek qytetarët, situata është serioze, hapi i ardhshëm do të ishte kufizim i plotë i lëvizjes, gjegjësisht orë policore“, deklaroi Filipçe.
Filipçe u shpreh se do propozohet dhe si masë që operatorët ekonomik të punojnë deri në ora 23:00 si dhe të ketë kufizim të kapaciteteve të transportit publik deri në 50 për qind.
“Nesër do të propozojmë edhe një masë, operatorët ekonomik të punojnë deri në ora 23:00, kufizim i kapaciteteve të transportit publik deri në 50 për qind, rekomandim deri tek gjykatat dhe komunat, procesi i punës të jetë me ndërrime apo edhe onlain, varësisht nga procesi i punës. Nesër në procedurë të shkurtër para deputetëve do jenë propozim ndryshimet e ligjit për mbrojtjen e popullatës nga sëmundjet infektive”, tha Filipçe.
Të dielën në Maqedoninë e Veriut rezultuan pozitiv me koronavirus 535 qytetarë dhe u shënuan 6 viktima./Jo.Be/Fjala.al
