Mbrëmja e parë në Champions League për këtë sezon ka rezervuar spektakël dhe gola në sfidat e para të saj.
Manchester United ka mposhtur sërish Paris Saint Germain, në përballjen e parë të grupit. Parizienët nuk arritën dot të hakmerreshin për atë eleminim të hidhur të vitit të shkuar. Ishte Bruno Fernandes ai që zhbllokoi rezultatin në minutën e 23’ nga pika e bardhë e pënalltisë duke dërguar skuadrën e tij në avantazh në pjesën e parë. Në të dytën Martial, i cili fitoi penalltinë shënoi në portën e vet në minutën e 55’ duke barazuar shifrat. Por kur dukej se gjithçka do të përfundonte në barazaim, Marcus Rashford realizoi me një gjuajtje të bukur në zonë duke i dhënë fitoren djajve të kuq.
Barcelona e ka nisur në mënyrën më të mirë të mundshme këtë edicion duke mposhtur 5-1 Ferencvarosin e Myrto Uzunit, me këtë të fundit që mungonte në sfidën e sotme. Magjiku Messi hapi serinë e golave nga penalltia në minutën e 27’, për tu pasuar më pas nga goli i talentit Ansu Fati në minutën e 42’. Pjesa e parë u mbyll 2-0 për katalanasit, ndërsa në të dytënm Philippe Coutinho, Pedri dhe Dembele shënuan sërish për Barçën ndërsa Ferencvaros shënoi golin e nderit me Kharatin në min 71’ nga pika e bardhë e penalltisë. Kjo penallti u shkaktua nga Pique që u largua me të kuq. Kështu katalanasit e nisin më së miri edicionin e ri të Champions League nën drejtimin e Ronald Koeman.
Goli i Haaland nuk i mjaftoi Dortmundit përballë një Lazioje në super formë që mposhti verdhezinjtë 3-1. Për bardhekaltërit shënuan Immobile dhe Akpa ndërkohë që iu shtua edhe autogoli i Hitz.
Ndërkohë në sfidat e tjera të Champions u shënuan këto rezultate:
Dinamo Kiev 0-2 Juventus
Zenit 1-2 Club Brugge
Chelsea 0-0 Sevilla
Leipzig 2-0 Bassaksehir
Rennes 1-1 Krasnodar
Pa.Va/Fjala.al
