Prokuroria e Posaçme ka mbyllur hetimet për çështjen e “Grabitjes së Rinasit”. Organi i akuzës ka vendosur të dërgojë për gjykim dosjen hetimore të një nga grabitjet më të bujshme në vend.
Mësohet se të pandehur për grabitjen e disa milionë eurove në 9 prill të 2019 në Rinas janë: Eldi dhe Klement Çala, Oltion Veseli, Renaldo Sula, Elton Pikli, Alkond Bengasi dhe Talo Çela, ky i fundit ende në kërkim.
Ndërkohë Prokuroria ka pushuar akuzën për Ragip Hajdinin i cili humbi jetën disa muaj më parë.
Më 9 prill të vitit të kaluar 4 persona të maskuar grabitën 4.6 milion euro nga barku i avionit “Austrian Airlines”. Paratë i përkisnin bankave të nivelit të dytë dhe do të transferoheshin jashtë Shqipërisë.
Autorët u futën nga hyrja e pasme e aeroportit me një furgon me mbshkrimin “Hetimi Tatimor”. Pas grabitjes, autorët u përleshën me policinë, ku mbeti i vrarë Admir Murataj, i cili cilësohet si koka e grupit.
Si u zbulua gjithë grupi nga gjurma në furgon
Identifikimi i Alkond Bengasit përmes një gjurme gishti në furgonin “Hetimi Tatimor” e më pas bashkëpunimi i tij me prokurorët, çoi në zbardhjen e pothuajse të të gjithë emrave të personave që morën pjesë në mënyrë direkte e indirekte në grabitje.
Duke qenë se Bengasi ishte një ndër personat që kishte ndihmuar në modifikimin e furgonit që u përdor në grabitje, ai kishte lënë gjurmë, edhe pse pjesa më e madhe e tyre ishin fshirë.
Por ekspertët që kanë bërë këqyrjen e furgonit, që i shpëtoi djegies në vendin ku u vra Admir Murataj, kanë konstatuar me sy të lirë një gjurmë gishti në pasqyrë. Ajo u fiksua në pasqyrën e brendshme, që ndodhet te mbrojtësja e diellit, në krahun e djathtë të furgonit. “Gjatë këqyrjes së automjetit me targë AA 248 KE, ndër të tjera ka rezultuar se në perden e diellit të anës së djathtë është konstatuar me sy të lirë gjurma daktiloskopike.
Nëpërmjet aktit të ekspertimit të kryer dy ditë pas grabitjes, më 11 prill 2019 ka rezultuar se në objektin e ekspertimit, fiksuar si provë materiale gjatë këqyrjes së vendit të ngjarjes, u përftua një gjurmë papilare e vlefshme për identifikim, e cila u shënua me germën ‘A’”, përshkruhet në dosjen e Prokurorisë së Krimeve të Rënda./Bl.Ba/Fjala.al
