Vizita e ministrit të Jashtëm të Greqisë Nikos Dendias është mbyllur me një vendim të rëndësishëm, ku së bashku me kryeministritn Edi Rama thanë se do ti drejtohen Gjykatës së Hagës sa i përket çështjes së detit.
Mediat greke e kanë komentuar këtë vizitë, dhe veçanërisht vendimin. Gazeta greke “Protothema” ka theksuar se i ka bërë përshtypje toni paqësor në fjalën e Kryeministrit kur foli për përpjekjet e qeverisë greke për të abroguar ligjin e Luftës.
Këtë vendim dhe vizitë e kanë komentuar edhe media të tjera të rëndësishme greke, si “Ta Nea” apo “To Bima”, të cilat hedhin dritë dhe për mënyrën se si palët do t’i drejtohen Hagës. Sipas tyre para se t’i drejtoheshin Hagës duhet të ishin zhvilluar bisedime 1-2-vjeçare mes vendeve.
“Greqia dhe Shqipëria ranë dakord që të dërgojnë në Gjykatën Ndërkombëtare të Hagës divergjencat e tyre në lidhje me përcaktimin e zonave detare. Kjo u njoftua gjatë vizitës së ministrit Dendias në Tiranë, nga ministri i Jashtëm grek dhe Kryeministri i Shqipërisë, Edi Rama.
Sipas informacioneve, përpara se t’i drejtohen Gjykatës së Hagës, Shqipëria dhe Greqia do të zhvillojnë bisedime dypalëshe brenda një periudhe të logjikshme kohore, përshembull një ose dy vjeçare”, shkruan “Protothema”.
Më tej ajo vijon shkrimin duke sqaruar se nëse gjatë kësaj periudhe, nuk arrihet një marrëveshje e pranuar nga Tirana dhe Athina, qeveria greke dhe qeveria shqiptare do të vendosin bashkërisht që të zgjidhin mosmarrëveshjet e tyre në Gjykatën Ndërkombëtare./Bl.Ba/Fjala.al
