Kryeministri Edi Rama deklaroi sot se Shqipëria me 4 aeroporte hyn në një epokë të re.
Në komunikimin e përjavshëm për ekonominë, Rama theksoi se me 4 aeroporte, atë të Tiranës, Vlorës, Kukësit dhe Sarandës, Shqipëria do të hyjë në një epokë të re, ndërsa pritet që kjo të ketë ndikim edhe për Kosovën.
“Ne kemi besim që nëse Vlora do të jetë një sukses, në aspektin e përfshirjes së një entiteti prestigjioz ndërkombëtar, edhe Saranda nuk ka arsye për të mos qenë një sukses. Besoj se me këto katër aeroporte, Tiranën, Kukësin, Vlorën dhe Sarandën, ne hyjmë në një epokë të re, qoftë në aspektin e infrastrukturës, qoftë në një kanal të ri ekonomik që hapim, jo vetëm për Shqipërinë, por edhe Kosovën”.
Më tej, ai foli edhe për infrastrukturën aeroportuale, duke u shprehur se së shpejti do të fillojë transferimin e portit të Durrësit, i cili do të jetë investimi më i madh privat në histori.
“Ky plani ynë, të s’postojmë portin ekzistues, i cili është një infrastrukturë e dalë kohe, me standarde mjedisore shumë të ulëta.
Faktikisht pengon hedhjen e një hapi në një epokë tjetër të Durrësit turistik. Shpresojmë të arrijmë një marrëveshje shtetërore për të sjellë aty një investim, i cili do të jetë investimi më i madh privat në histori, me një formulë bashkëpunimi me shtetin.
Ne do të fillojmë në javët në vijim procesin për spostimin, duke hedhur në një garë ndërkombëtare portin e ri të Durrësit, i cili do të zhvillohet në anën tjetër, aty ku është edhe plani për zonën e lirë ekonomike. Kemi shumë kërkesa. Po kështu do të bëjmë edhe me Vlorën,” deklaroi ndër të tjera kryeministri.
Kujtojmë se aktualisht, i vetmi aeroport funksional është ai i Rinasit.
